Түркістан облысындағы мыңыншы мектеп Сарыағаш ауданында орналасқан. №78 жалпы білім беретін мектептің ел игілігіне пайдалануға берілгеніне 1 жыл толды.
Алғашында 1024 оқушыға есігін айқара ашқан бұл білім ұясында бүгінде 1434 оқушы білім нәрімен сусындап келеді. Білім ордасының 1 жылдық мерейтойына орай мектеп ұжымы ауқымды іс-шаралар ұйымдастырды. Атап айтсақ, дене шынықтыру пәнінің бірлестігі «Толағай» эстафеталық сайыстың өтуіне мұрындық болды. 6 пән бірлестігінің мұғалімдері бой көрсеткен жарыс 6 кезең бойынша өрбіді. Сондай-ақ, іс-шаралар М.Жұмабаевтың шығармашылығына арналған әдеби кешпен, «Мектебім — жарқын болашағым» атты сыныптан тыс тәрбие сағатымен жалғасын тапты.
Жаңа мектепті жаңа жетістіктерге жетелеп келе жатқан тың бастамалар да бар. Қаңтар айынан бастап оқытушылар мектеп оқушыларын ақпараттық технологияларға үйретіп, робот құрастыруға машықтандыруда.
Жаңа мектептің жас педагогтары да жетістік пен жеңістен құр алақан емес. Мектеп ашылған сәттен бастап оқушылар жан-жақты қабілеттерін шыңдаса, ұстаздар қауымы бар ерік-жігерімен білімді, саналы ұрпақ тәрбиелеуге атсалысуда.
