Кентау қаласында орналасқан Әлия Молдағұлова атындағы №19 ақпараттық технологиялар мектеп-лицейінде қызмет атқаратын Алтынбек Әбсейтті әріптестері «мақтанышымыз» деп бағалайды. Себебі, жас болса да білімі мен біліктілігін таныта алған ұстаз республикалық байқаулар мен олимпиадалардан жүлделі орындарды жеңіп алуда. Сондай-ақ, химия пәнінен сабақ беретін Алтынбек Серікбайұлының шәкірттері де білім саласындағы жетістіктерімен республиканы бағындырып жүр.
Атап айтқанда, 2022-2023 оқу жылдарында Камшат Бимолдаева ғылыми жұмыс бойынша облыстан жүлделі І орынды иеленсе, Жанат Кенжебекова республикадан «Алтын медаль» алып келді. Одан бөлек, 10-шы сынып оқушысы Жанат Кенжебекова облыс көлемінде, облыс әкімінің «Үздік жас ғалым» номинациясын жеңіп алған.
Жалпы Алтынбек Әбсейт өте креативті, шығармашыл, өзі де көп ізденеді. Сабақ барысында түрлі лайфхактар, жаңа техникалар мен инсайттарын көрсету арқылы оқушыларды білімге ынтасын арттырып отырады.
Жас ұстаздың өзі Түркістан облысы әкімдігінің «Білім саласын дамытуда қол жеткен табыстары және оған қосқан үлесі үшін» және Кентау қаласы әкімдігінің «Қаланың білім беру саласының дамуына қосқан үлес үшін» марапаттарының иегері. Республикалық дарынды балаларды анықтау және қолдау орталығы «Жалпы білім беретін пәндер бойынша Республикалық ғылыми жобалар конкурсының жеңімпазын дайындағаны үшін» алғыс хатпен, ҚР оқу-ағарту министрлігі «ЖАҢА-МЕКТЕПКЕ ЖАҢАШЫЛ ҰСТАЗ» жас педагогтердің VI Республикалық байқауына қатысып, кәсіби шеберлігін көрсеткені үшін І дәрежелі дипломмен және де осы секілді бірнеше марапаттармен наградталған. Қазіргі кезде ол Қазақ Ұлттың Университетінің PhD докторанты.
