Жаз маусымында мектеп оқушылары демалысқа шығатыны белгілі. Міне, осы демалысты әрбір оқушы тиімді өткізе білгені абзал. Жазғы демалысын пайдалы өткізген бала жаңа оқу жылына тың күшпен барады. Осыған орай, Сауран аудынанда биыл 23 364 оқушы жазғы демалыспен қамтылады. Оның 1451-і 11-сынып түлектері. Бастауыш сынып оқитын жастар үшін мектеп жанындағы лагерлер 3 ауысымда жұмыс істейді. Онда 9666 бала қамтылып отыр. Қазіргі таңда 1 ауысым жұмысына 3150 бала баруда. Мыңнан астам оқушылар қала сыртындағы сауықтыру лагерьлеріне жіберіледі. Сонымен қатар, ауыл мектептерінен 150 оқушы «Қазақстан халқына» қорының қаражаты есебінен демалады. 1 маусым күні 50 бала аталмыш қор арқылы сауықтыру лагерлеріне жіберілді.
Жазғы маусымда оқушылар көп уақытын сыртта өткізеді. Әйтсе де көптеген қайғылы оқиға да сыртта, оның ішінде су айдындарында орын алып жатады. Сондықтан Сауран ауданының басшысы Мақсат Таңғатаров қауіпсіздік шараларын күшейтуді тапсырған болатын. Осы бағытта аудан әкімі Мақсат Таңғатаровтың бастамасымен, аудандық мәслихат депутаттарының қолдауымен білім ошақтарында демеушілер тарапынан жаңа 20 дана жиналмалы бассейндер орнатылуда. Тың жобаның негізгі мақсаты – бала қауіпсіздігін сақтай отырып, жазғы демалыста оқушылардың уақытын тиімді пайдалану. Ағын су қауіпінен болатын оқыс оқиғалардың алдын алып, бала өміріне араша түсу.
Жаз – суға түсуге қолайлы мезгіл. Алайда, қауіптілігі тіптен жоғары. Әсіресе, кәмелетке толмаған балалардың үлкендерсіз дария, каналдарға барып, суға шомылуы жағдайды ушықтыратыны анық. Сондықтан ең басты мақсат – балаларға сапалы білім беру және балалардың қауіпсіздігін қамтамасыз ету. Бала қауіпсіздігі мәселесінің маңызы зор. Әр ата-ана баласының қауіпсіз ортада өмір сүріп, дені сау, білім – білігі мол саналы ұрпақ болғанын қалайды. Ол үшін мектептегі қауіпсіздік шаралары сенімге селкеу түсірмейтіндей болуы қажет.
