Келесте «Жайлы мектеп» ұлттық пилоттық жобасы аясында 300 орындық жайлы мектептің құрылысы жүргізіліп жатыр. Облыс әкімі Дархан Сатыбалды Келес ауданынан арнайы барған іссапарында Біртілек ауылдық округіндегі 300 орындық мектептің құрылыс жұмыстарымен танысты. Өңір басшысы білім нысанын салу барысында сапаға баса назар аударуды атап өтті.
Отандық компаниялардың құрылыс материалдарының бағасын көтеріп жібергенін айтқан мердігерлер қосымша қаражаттың қажеттігін жеткізді. Облыс басшысы кішігірім мектеп үшін бекітілген қаражаттың жеткілікті екеніне тоқталып, құрылыс жұмыстарын кестеге сәйкес аяқтауды тапсырды.
«Жайлы мектеп» ұлттық пилоттық жобасы аясындағы құрылысты «Samruk-Kazyna» АҚ тапсырысымен «Шымкент Автоматика» ЖШС жүргізіп жатыр. Жалпы жер көлемі 2,3 га. Өткен жылы басталған білім ошағы биыл аяқталады деп жоспарлануда. Жалпы жоба құны – 2,6 млрд теңге. Бүгінде құрылыс алаңында 69 адам, 5 техника жұмыс істеп тұр.
