Қазақстан Республикасының «Діни қызмет және діни бірлестіктер туралы» заңына сәйкес діни қызметпен айналысудың өзіндік шарттары мен талаптары бар. Дін — жауапкершілігі өте ауыр, бірақ өте нәзік сала. Осы саланы қадағалайтын арнайы органдар, жергілікті атқарушы билік өкілдері бар.
Уәкілетті орган дегеніміз — діни қызмет саласындағы мемлекеттік реттеуді жүзеге асыратын мемлекеттік орган.
Діни бірлестік — Қазақстан Республикасы азаматтарының, шетелдіктер мен азаматтығы жоқ адамдардың өз мүдделерінің ортақтығы негізінде діни қажеттіліктерін қанағаттандыру үшін Қазақстан Республикасының заңнамалық актілерінде белгіленген тәртіппен біріккен ерікті бірлестігі;
Діни қызмет дегеніміз — діндарлардың діни қажеттіліктерін қанағаттандыруға бағытталған қызмет. Міне осы жоғарыда келтірілген діни бірлестіктер ғана біздің елімізде дінді насихаттап, діни қызметпен айналысуларына болады. Дегенмен де оларға да біршама шектеулер бар. Мысалы, жоғарыда айтылған кез-келген діни бірлестік өзіне берілген территорияларда, яғни құлшылық ету ғимараттарында ғана дінді насихаттаумен, уағыздаумен айналыса алады. Ал одан тыс жерлерде дінді насихаттау, тарату оқиғалары кездессе, оларға көзделген жауапкершілік бар.
Діни қызметпен айналысудың артықшылығы айналаңа тиғізер көл көсір пайдаң. Яғни бүкіл қоғамды дұрыс жолға бағыттауға аз ғана үлесіңді қосасың. Негізінде кез келген дін жақсылыққа үгіттейді. Айналадағы болып жатқан түрлі жағдайларға байсалдылықпен, сабырлықпен қарап көркем мінезді болуға тырысуымыз керек. Ата-бабаларымыздан айтқандай айналаңа, әрбір жанға жақсы сөз сөйле не болмаса үндеме дегендей ешкімге зиянымыз тиіп кетпегені абзал.
Бүгінгі таңда интернет өте үлкен әлеуметтік күшке айналып отыр. Осы интернет және әлеуметтік желілер арқылы жат ағымдар жалған діни ұстанымды жастарға насихаттап жүр. Сананы улайтын, теріс пиғылды адамдардың арбауына жастар түсіп, зардабын көруде. Жастар түрлі сайттарға кіріп, әр түрлі парақшаларға тіркеліп, сол оқыған нәрсесін дұрыс деп санап, қоғамннан да сол нәрсені талап етеді. Ғаламтордың осындай жетістігі мен қолжетімділігін дәстүрлі емес діни ағымдар да өз пайдаларына тиімді қолдануда. Олардың қызметі өздерінің идеологиясын белсенді түрде насихаттауға, жаңа мүшелерді өз қатарларына тартуға, жақтастарын теориялық және практикалық тұрғыдан оқытуға және өздеріне қарсы шыққан желі қолданушыларына қарсы ақпараттық күрес жүргізуге бағытталады.
Сондықтан кез-келген туындаған діни сұрақтарды өзіміздің Қазақстан мұсылмандары діни басқармасы мақұлдаған ұстаздарды, имамдарды, дін ғалымдарын тыңдауға шақырамыз. Әйтпесе интернет желісінде көптеген дұрыс жолдағы емес уағызшыларды кезіктіріп жатамыз. Діннен хабары болмаған кез-келген азамат сол уағызшылардың айтқанына сеніп соғынан еріп кетуі мүмкін.
Ә.Жақсыбаев
Әмина мешітінің имамы
