Сарыағаш ауданы білім бөліміне қарасты Қызылжар ауылдық округіндегі «Бала би» және Қапланбек ауылдық округіндегі «Кәусар» балабақшаларында ағымдағы жөндеу жұмыстары жүргізілуде. Мектепке дейінгі білім беру ұйымдарындағы жөндеу жұмыстарын бөлім басшысы Дәулет Анасұлы көріп қайтты.
Ағымдағы жөндеу жұмыстарын көзбен көріп, нақты жағдайды бағамдап, сапасын бақылаудың мазыздылығын айтты.
Қазіргі таңда ғимараттардың қабырғалары толық қалпына келтіріліп, электр жүйелері ауыстырылуда. Нысанның қабырғаларын сырлау, әрлеу, едендерді ретке келтіру жұмыстары жүргізіліп жатыр.
Бұған қоса, Ақ үй елді мекеніндегі №69 жалпы білім беретін мектебінің жылыту жүйесі қатты отыннан көгілдір отынға өтіп, жуық арада іске қосылмақ.
Күрделі жөндеу және ағымдағы жөндеу жұмыстары жүргізіліп жатқан нысандардың жұмыс барысын бақылау мақсатында жұмысшы топ құрылып, апта сайын қадағаланатыны туралы қосымша ескертілді.
Одан бөлек аудандық бөлім басшысы Дәулет Акатов 2024 жылғы жаңа оқу жылына дайындық аясында күрделі жөндеу жұмыстары жүргізіліп жатқан №22, №35 мектептерге барып жөндеу жұмыстарының барысын тексерді.
Мердігер мекеме мамандары бөлім басшысына жөндеу жұмыстарын таныстырды. Білім ордасының жаңа оқу жылына дайындығын пысықтаған Дәулет Анасұлы күні бүгінге дейін атқарылған құрылыс жұмыстарын саралады. Жөндеу жұмыстарын сапалы аяқтап, жаңа оқу жылына дейін барлық шаруа мүлтіксіз орындалуы керектігін айтты.
Қазіргі таңда күрделі жөндеуден өтіп жатқан Жартытөбе ауылдық округіндегі №35 Б. Гафуров атындағы білім ұясында және Дербісек ауылдық округінде орналасқан №22 Елшібек батыр атындағы мектепте ғимарат шатырын жабу, ішкі сылақтарын жүргізу, электр жүйелерін жаңарту жұмыстары атқарылып жатыр.
Айта кетейік, бүгінде №52 Өтемісұлы атындағы жалпы білім беретін мектебінде ағымдағы жөндеу жұмыстары басталды. Сондай-ақ, №50 Б. Омаров атындағы жалпы білім беретін мектебінің қосымша ғимаратын, №77 және №69 білім ұяларын көгілдір отынмен қамту бойынша жұмыстар атқарылуда.
