Түркістан облысы, Сайрам ауданының білім саласында тағы бір бітіруші түлек жоғары жетістікке қол жеткізді. Атап айтсақ, Жібек жолы ауылдық округінде орналасқан Бөкейхан атындағы жалпы білім беретін мектебінің бітіруші түлегі, «Алтын белгі» иегері Амантай Нұрсезім Ерденқызы кезекті ұлттық бірыңғай тестілеуден жоғары балл жинады.
Мұнан алдыңғы сынақтан сүрінбей өткен түлег 131 балл жинап, бірінші мүмкіндігін ұтымды пайдаланған болатын. Талапкер тестілеудің екінші мүмкіндігінде 136 балл алды. Бұл – қазіргі таңда аудан бойынша ең жоғары көрсеткіш.
Білімі арқылы биікті бағындырғандардың бірі Абдихалилова Дилнура. Ол №11 «Манкент» жалпы білім беретін мектептің түлегі. Өзіне артылған жүкті абыроймен еңсере білді. Көпбалалы отбасыдан шыққан оқушы 9-сыныпты да үздік аттестатқа бітіріп, оқу жылының соңында «Алтын белгі» иегері атанды.
Ұстазының айтуынша, «2023-2024 оқу жылында жалпы білім беретін пәндер бойынша оқушылар олимпиадасының» аудандық кезеңінен Қазақстан тарихы пәнінен жүлделі II орынды иеленген.
Зерек баланың мектеп кабырғасында оқып жүргенінде Қазақстан тарихы, биология, химия, алгебра, қазақ тілі, өзбек тілі және ағылшын тілі пәндерін жақсы меңгеруге қызығушылығы артқан.
Ұлттық бірыңғай тестілеудің бірінші мүмкіндігінде 119 балл, екіншісінде 131 балл алды. Қазақстан тарихынан 20 балл, биология және химия пәндерінен 47 баллдан, математикадан 10 балл, оқу сауаттылығынан 7 балл жинаған.
Бүгінде талапкердің алдына қойған мақсат-армандары көп. Соның ішінде болашақта дәрігер мамандығына ие болуды армандайды.
Әрбір оқушы алдыңғы буынға қарап, бой түзеп, білімнің шыңына шығуды көздейді. Әсіресе, «Алтын белгі» иегері атану құрметіне қол жеткізу үшін өзгеден артық талпынып, басқадан ерек ізденеді.
Аудандағы білім саласы жағымды жаңалыққа толықты. Оқу жылын үздік аяқтаған оқушылар ұстаздары мен ата-анасының үмітін ақтап, білімін тағы да дәлелдеді.
Биыл өңірде 2023-2024 оқу жылында Ұлттық бірыңғай тестке 27 мыңнан аса оқушы өтінім білдірді. Жалпы облыста 32 306 оқушы 11-сыныпты бітіріп отыр. Оның 1727-сі «Алтын белгіге», 2 466 оқушы – «Үздік аттестатқа» үміткер.
Айта кетейік, ҰБТ-2024 басталғалы бері 264 мың рет тест тапсырылды. Оның ішінде талапкерлердің 77%-ы шекті балл жинады. Орташа балл – 69 балл, ең жоғары балл – 140 балл. Ерекше білім беру қажеттілігі бар 620 талапкер қатысты.
