Түркістан облысының Әділет департаменті 2024 жылы 2 189 мемлекеттік қызмет көрсеткен. Оның 1 956-сы қағаз түрінде болса, 233-і электронды түрде. Бұл туралы Түркістан облысының Әділет департаменті басшысының міндетін атқарушы Мұхит Тұрғараев БАҚ өкілдерімен өткен брифингте мәлімдеді.
«Өткен жылы облыс көлемінде 1 263 заңды тұлға бойынша мемлекеттік қызмет көрсетілді. Көрсетілген қызмет түрлерінен бюджетке 4 миллиард 334 миллион 708 мың теңгеден астам мемлекеттік алымдар түсті және сот шешімімен 76 заңды тұлғаның, филиалдар мен өкілдіктер таратылды. Өңірде жалпы 205 нотариус тіркелген. Әртүрлі негіздер бойынша 3 нотариустың лицензия қолданысы тоқтатылған болса, 8 лицензия уақытша тоқтатылған. Және сот шешімі бойынша 2 нотариус қызмет көрсету құқығынан айырылды»,- деді спикер.
Сондай-ақ, «Азаматтарға арналған үкімет» Мемлекеттік корпорациясы» КЕАҚ Түркістан облысы бойынша филиалымен жылжымайтын мүлікке құқықтарды тіркеу бойынша жалпы 167 199 мемлекеттік қызмет көрсетілген. Одан бөлек, 73 463 азаматтық хал актілері тіркелген. Оның ішінде, тууды тіркеу – 52 794, қайтыс болу – 9 814, некеге тұруды тіркеу – 10 238, некенің бұзылуын тіркеу – 617. Сонымен қатар, облыста Қазақстан Республикасының Әділет министірлігімен 2024 жылдың тамыз айынан бастап «Робот сот орындаушысы» жобасы іске қосылып, оңайлатылған іс жүргізу жұмыстары қолға алынған. Бұл жоба азаматтарға айыппұл соммасынан бөлек 25%-ға дейінгі мөлшердегі жеке сот орындаушының қызмет ақысын төлеуден босатып, тек айыппұлдарды өндіруге мүмкіндік берген.
