Қазіргі жаһандану дәуірінде шетелде білім алу – жастар үшін үлкен мүмкіндік әрі болашаққа салынған инвестиция. Әсіресе діни білім саласында шетелдік оқу орындарының тәжірибесі мен ілімі қызығушылық тудырады. Дегенмен, бұл саланың өзіндік ерекшелігі мен жауапкершілігі де бар. Сондықтан шетелде діни білім алуға ниет білдірген жастар мен олардың ата-аналары бұл шешімге байыппен қарауы тиіс.
Мысырдағы Әл-Азһар университеті, Түркия, Сауд Арабиясы, Малайзия, Пәкістан және Иран секілді елдердегі беделді ислам университеттері терең діни білім береді. Бұл оқу орындарында ғасырлар бойы қалыптасқан діни дәстүр мен ғылыми орта бар.
Араб, түрік немесе парсы тілінде оқу – Құран, хадис, фикһ, ақида ілімдерін түпнұсқадан меңгеруге мүмкіндік береді. Бұл болашақ имам, ұстаз немесе теолог үшін үлкен артықшылық. Шетелдегі оқу орындарында діни пәндермен қатар, философия, тарих, логика, мәдениеттану секілді салалар да оқытылады. Бұл діни білімнің көкжиегін кеңейтуге ықпал етеді.
Дегенмен, шетелде діни білім алу тек мүмкіндіктерден тұрмайды, оның кейбір қауіптері де бар:
- Деструктивті ағымдар ықпалы
Кей елдердегі жеке оқу орталықтары мен медреселер радикалды немесе дәстүрлі емес бағыттарды насихаттауы мүмкін. Мұндай жағдайда жастар өз елінің діни ерекшелігінен алшақтап кетуі ықтимал.
- Мәдени ортаға бейімделу
Шетелге алғаш барған жастар жаңа ортаға бейімделуде қиындық көруі мүмкін. Бұл рухани күйзеліс пен адасуға әкеліп соғуы ықтимал.
- Діни білімнің ел мүддесіне сай келуі
Әр елдің діни саясаты мен ұлттық құндылықтары әртүрлі. Қазақстанда діни білім мемлекеттік және ұлттық мүдделермен үйлесуі тиіс. Сондықтан шетелде алған діни білім отандық рухани құндылықтармен үндес болуы қажет.
Қазақстанда да соңғы жылдары діни білім беру саласы дамып келеді. Нұр-Мүбарак университеті, ҚМДБ медресе-колледждері халықаралық стандартқа сай білім беруде. Егер шетелге бару ойы болса, онда мына жайттарды ескеру керек:
- ҚМДБ және Дін істері комитеті мақұлдаған оқу орындарын таңдау
- Шетелге шығу алдында рухани және мәдени дайындық
- Отанға оралған соң алған білімді еліміздің тыныштығы мен рухани тұтастығына қызмет ететін бағытта пайдалану
Шетелде діни білім алу —үлкен жауапкершілік пен терең түсінікті талап етеді. Басты мақсат – тек білім алу емес, сол білімді ел игілігіне жарату. Жастарымыз діни тұрғыдан терең, бірақ радикалды емес, дәстүрлі және ұлттық құндылықтарға адал болуы тиіс.
Дастан Курбанкулов,
Қарнақ мешітінің бас имамы
