Тау етегіндегі табиғаты тамаша Төлеби ауданы туризм мен ауылшаруашылығына қолайлы аймақ болып табылады. Бұл өңірдің топырағы құнарлы, шөбі шүйгін, сондықтан егіншілікпен айналысуға және мал өсіруге барлық жағдай жасалған. Ауданның табиғи байлығы мен қолайлы климаты туризмді дамытуға үлкен мүмкіндік береді.
Төлеби ауданында жалпы 552 автомобиль жолы бар, олардың ұзындығы 1110 шақырымды құрайды. Бұл жолдардың ішінде облыстық маңызы бар жолдар 260 шақырымды, аудандық маңызы бар жолдар 170 шақырымды, ал елді мекендердің ішкі жолдары 754 шақырымды қамтиды. Жолдардың сапасына ерекше көңіл бөлініп, облыстық маңызы бар жолдардың 94,7 пайызы қанағатты жағдайға жетсе, аудандық маңызы бар жолдардың 95,6 пайызы және елді мекендердің ішкі жолдарының 95 пайызы сапалы деп бағаланған.
2025 жылы ауданда жолдарды жөндеуге үлкен қаржы бөлініп отыр. Жалпы 1,2 миллиард теңге көлемінде қаражат (АЕБ – 473 млн теңге, ЖБ – 425 млн теңге, ОБ – 300 млн теңге) бөлініп, 59,4 шақырымға созылатын 43 көше орта жөндеуден өтуде. Қазіргі таңда 14 нысанда тас төсеу жұмыстары белсенді жүргізілуде. Бұл жұмыстар ауданның көлік инфрақұрылымын жақсартуға, тұрғындар мен қонақтардың сапалы және қауіпсіз жүріп-тұруына зор мүмкіндік береді.
Төлеби ауданының дамуы үшін жол инфрақұрылымының жақсаруы ерекше маңызды. Жақсы жолдар туристер мен кәсіпкерлерді тартып, ауыл шаруашылығы өнімдерінің нарыққа тасымалдануын жеңілдетеді. Осылайша, ауданның әлеуметтік-экономикалық жағдайы жақсарып, оның табиғаты мен инфрақұрылымы үйлесім табады.
Жалпы, Төлеби ауданының табиғи байлығы мен жол инфрақұрылымының дамуы өңірдің туризм мен ауылшаруашылығын одан әрі көтеруге жағдай туғызады. Бұл ауданның жарқын болашағы үшін маңызды қадам болып табылады.
Орайы келгенде айта кетейік, жалпы Түркістан облысында жол құрылысы мен жол жөндеу жұмыстарының сапасы қатаң бақылауда. Биыл Түркістан облысындағы жергілікті маңызы бар жолдардың жақсы және қанағаттанарлық жағдайдағы үлесін 95%-ға жеткізу көзделген. 2025 жылы облыс аумағындағы автомобиль жолдары саласын дамыту үшін құрылыс-жөндеу жұмыстарымен 202 нысан немесе 1 103 шақырым жол мен көшелер қамтылмақ. Жыл аяғына дейін 547 шақырымды құрайтын 123 нысан пайдалануға берілмек. Облыстық, аудандық маңызы бар жолдар мен елді мекен көшелері жаңарып, «Ауыл – ел бесігі» бағдарламасы аясында 140 елді мекенде 89 нысан жөндеуден өтеді.
Нысандардағы жұмыстар мен қолданылып жатқан материалдардың сапасы жауапты және қадағалаушы мекемелерден бөлек, «Ұлттық жол активтері сапасы орталығы» РМК ТО филиалының тұрақты бақылауында. Сынама сапасы талапқа сай келмейтін нысандар қабылданбайды. Сот арқылы кемшіліктер қайта қалпына келтіріледі.
