2025 жылдың алғашқы 5 айының қорытындысы бойынша Түркістан облысы еліміздің экономикасында үлкен жетістіктерге қол жеткізіп, қысқа мерзімді экономикалық өсім көрсеткішімен бірінші орынға шықты. Өңірдің экономикасы жоғары қарқынмен дамып, экономикалық өсім 120,4%-ды құраған. Бұл Түркістан облысының еліміздегі жетекші аймақтардың біріне айналғанын көрсетеді.
Экономикалық өсім негізінен тау-кен, өңдеу, уран өндірістері, құрылыс индустриясы мен ауыл шаруашылығы саласындағы ілгерілеу есебінен орын алды. Осылайша, облыс экономикасының өсімі бірнеше салада тұрақты даму мен даму нәтижесінде жүзеге асырылуда.
5 ай көлемінде Түркістан облысының өнеркәсіп өнім көлемі 593,0 млрд. теңгені құрап, 14,8%-ға артты. Бекітілген жоспардың 105,5%-ы орындалып, өңдеу өнеркәсібі 280,4 млрд. теңге көлемінде өнім өндірді, ал тау-кен өнеркәсібі 259,6 млрд. теңгені құрады.
Ауыл шаруашылығы саласында өндірілген өнімнің көлемі республикада ең жоғары көрсеткішке ие болып, 194,3 млрд. теңгені құрады, өсім 6,3%-ға артты. Бұл сала Түркістан облысының экономикалық өсімінің маңызды бағыттарының бірі болып қала береді.
Құрылыс индустриясында 117,4 млрд. теңгенің жұмыстары атқарылып, жыл басынан пайдалануға берілген тұрғын үйлердің жалпы алаңы 306,1 мың шаршы метрге жетті, бұл жоспардың 125,5%-ына тең. Құрылыс саласындағы өсім 1,4 есеге артты.
Сауда көлемі 269,7 млрд. теңгені құрап, жоспардан 1,6 есе артығымен орындалды. Ал көлік және қоймалау қызметтерінің көлемі 209,3 млрд. теңгені құрады, өткен жылдың осы кезеңімен салыстырғанда 23,4%-ға өскен.
Байланыс қызметінің көлемі 4,9 млрд. теңгені құрап, 15,2%-ға артты.
Түркістан облысы экономикалық дамудың тұрақты жолында болашағына үлкен сеніммен қарап, жоспарланған межелерге жету үшін алдағы уақытта да тиісті жұмыстарды жалғастырады. Облыстың әлеуеті мен мүмкіндіктері мол, бұл өңірдің даму қарқынының одан әрі артатынын көрсетеді.
