Түркістан облысының Сарыағаш ауданында Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» ұлттық экологиялық акциясы аясында ауқымды сенбілік ұйымдастырылды. Іс-шараға аудан әкімдігі қызметкерлері, мекеме ұжымдары, еріктілер мен тұрғындар белсене қатысты.
Тазалық жұмыстарына аудан әкімі Арман Абдуллаев та арнайы қатысып, тұрғындармен бірге қоршаған ортаны тазартуға атсалысты. Аудан басшысы бірқатар учаскелерді аралап, тазалық және абаттандыру жұмыстарының барысын бақылап, сала басшыларына нақты тапсырмалар берді.
– Бұл науқан – қоршаған ортаны таза ұстаумен қатар, экологиялық мәдениетті қалыптастыруға бағытталған маңызды бастама. Мұндай игі шаралар – ортақ жауапкершілікті арттырып, елді мекендердің көркеюіне ықпал етеді, – деді аудан әкімі.
Сенбілік таңғы сағат 08:00-де басталып, ауданға қарасты мекемелер өздеріне бекітілген аумақтарда жұмыс жүргізді. Іс-шара барысында республикалық және облыстық маңызы бар автожолдар бойы, қоғамдық орындар мен ішкі көшелер, аулалар мен саябақтар, қоқыстан тазартылып, қураған шөптер мен бұтақтар жиналды.
Сонымен қатар, ағаштар ретке келтіріліп, әктеу-сырлау жұмыстары жүргізілді.
