Қазақстан Республикасы Су ресурстары және ирригация вице-министрі Ерболат Ибрайханов жұмыс сапарымен Түркістан облысына келіп, өңірдегі су шаруашылығы саласында атқарылып жатқан жұмыстардың барысымен танысты.
Сапар барысында вице-министр облыс орталығында орналасқан «Қазсушар» РМК Түркістан филиалына барып, мамандармен және жергілікті атқарушы билік өкілдерімен кездесті. Басқосуға Түркістан облысы әкімінің орынбасары Нұрбол Тұрашбеков, «Қазсушар» РМК Түркістан филиалының директоры Қазыбек Бедебаев, сондай-ақ «Тұран-Су» мекемесінің өкілдері қатысты.
Кездесуде суармалы егістік алқаптарды тиімді сумен қамту, су үнемдеу технологияларын енгізу, ирригациялық жүйелерді жаңғырту мәселелері кеңінен сөз болды. Ерболат Ибрайханов өз сөзінде су тапшылығы мәселесіне ерекше тоқталып, оны шешу бағытында бірқатар нақты ұсыныстарды ортаға салды. Сонымен қатар, ИБР (Ислам даму банкі) бағдарламасы аясында облыс аумағында жүргізіліп жатқан тік ұңғымалар құрылысының биылғы жыл соңына дейін толығымен аяқталуы тиіс екенін ескертті.
– Су ресурстарын тиімді басқару – елдің азық-түлік қауіпсіздігі мен ауыл шаруашылығының тұрақты дамуы үшін аса маңызды. Бұл бағытта жергілікті билік пен тиісті мекемелер арасында өзара үйлесімді жұмыс болуы шарт, – деді вице-министр.
Айта кету керек, бүгінде «Қазсушар» РМК Түркістан филиалы тарапынан 300 шақырымға жуық су арналары механикалық әдіспен тазартылған. Сонымен қатар, ҚР Су ресурстары және ирригация министрлігінің қолдауымен филиалдың техникалық базасы 38 бірлік жаңа техникамен толыққан.
Жұмыс сапары аясында вице-министр аймақтағы бірқатар су нысандарын аралап, жергілікті жағдаймен егжей-тегжейлі танысуы жоспарланған.
