Түркістан облысы мен Сауран ауданы тұрғындарының тұрмыс сапасын арттыруға бағытталған маңызды жобалар жүзеге асырылуда. Соның бірі – Аша елді мекенін табиғи газбен қамтамасыз ету. Бұл ауылда 4 200-ге жуық адам тұрады. Аудан әкімі Мақсат Таңғатаров тиісті бөлім басшыларымен бірге Шорнақ ауылдық округіне қарасты Аша елді мекенінде болып, тұрғындармен кездесу өткізді.
Кездесу барысында аудан басшысы ауылды газбен қамтуға арналған жаңа жобаның іске қосылғанын хабарлады. Жоба аясында жалпы ұзындығы 19 300 метр жоғары қысымды және 34 600 метр орта қысымды газ құбыры жүргізіледі. Сонымен қатар, 1 дана газ реттеу пункті орнатылып, 832 үйге табиғи газ жеткізілмек. Жобаның толық іске асырылуы нәтижесінде 4 160 адам көгілдір отынға қол жеткізеді. Құрылыс жұмыстары 2025 жылдың тамыз айында басталып, 2026 жылы аяқталуы жоспарлануда.
Аудан әкімі Мақсат Таңғатаров тұрғындар алдында сөйлеген сөзінде ауылды табиғи газбен қамту – тұрғындардың тұрмыс сапасын жақсартуға бағытталған стратегиялық маңызды қадам екенін атап өтті. Құрылыс сапасына ерекше назар аударылатынын, тиісті бөлімдер мен мердігер ұйымдарға нақты тапсырмалар берілгенін жеткізді.
– Президент Қ. Тоқаевтың Жолдауында аймақ тұрғындарының сапалы және қауіпсіз өмір сүруін қамтамасыз ету – басты басымдықтардың бірі деп көрсетілген. Біз Аша елді мекенін газбен қамту арқылы осы бағыттағы маңызды міндетті орындап отырмыз, – деді аудан әкімі.
Тұрғындар өз кезегінде ауылға газ жеткізу – көптен күткен қуанышты жаңалық екенін айтып, алғыстарын білдірді. Бұл жобаның іске асуы ауылдың әлеуметтік-инфрақұрылымын нығайтып, тұрғындардың күнделікті тұрмысын жеңілдететін маңызды бастама болып табылады.
Сондай-ақ, жобаның жүзеге асырылуы жергілікті жұмыс орындарын ашуға, құрылыс саласында білікті мамандардың тәжірибесін арттыруға мүмкіндік береді. Алдағы уақытта аудандағы барлық елді мекендерді сапалы табиғи газбен қамтамасыз ету жоспары жүзеге асырылмақ, бұл – өңірдің әлеуметтік-экономикалық дамуына серпін беретін стратегиялық қадам.



