Мемлекет басшысы Қасым-Жомарт Тоқаев өзінің Жолдауларында бірнеше мәрте халықты сапалы ауыз сумен қамтамасыз етуді ең өзекті әлеуметтік міндеттердің бірі ретінде атап өткен болатын. Президент атап өткендей, елді мекендердің инфрақұрылымын жаңғырту, ауыл тұрғындарының өмір сапасын арттыру – мемлекеттік саясаттың негізгі бағыттарының қатарында. Осыған орай Түркістан облысында да ауыз су тапшылығын шешу бағытында ауқымды шаралар қолға алынуда.
Осы мақсатта облыс әкімінің бірінші орынбасары Зұлпыхар Жолдасов Сауран ауданына арнайы іссапармен барып, елді мекендердің ауыз су мәселесін жан-жақты зерделеді. Жаз айларында су қорының жетіспеушілігіне байланысты кейбір ауылдарға ауыз су кестемен беріліп келген болатын. Бұл мәселені түбегейлі шешу үшін аудан көлемінде кешенді жұмыстар жүйелі түрде жүргізілуде.
Атап айтқанда, Ескі Иқан ауылдық округіндегі Ескі Иқан елді мекенінде жаңа магистральді су құбыры тартылып жатыр. Құрылыс жұмыстары жыл соңына дейін толық аяқталып, ауыл тұрғындары таза ауыз сумен тұрақты қамтылатын болады. Бұдан бөлек, Мәшһүр Жүсіп пен Ескі Сауран елді мекендерінде қосымша ұңғымалар қазу жоспарланған. Ал Жүйнек елді мекенінде қосымша су қоймасы (резервуар) орнатылып, халықтың қажеттілігін толық өтеу көзделіп отыр.
Сондай-ақ, 30 жылдық елді мекенінде 337 абонентке арналған водозабор салу және ішкі су жүйелерін жүргізу үшін жобалау-сметалық құжаттама әзірленуде. Бұл бастама жүзеге асқан жағдайда тұрғындардың тұрмыстық жағдайы едәуір жақсарып, ауылдағы әлеуметтік тұрақтылықты қамтамасыз етуге септігін тигізеді.
Іссапар барысында Зұлпыхар Жолдасов бірқатар су нысандарының жұмысымен танысып, құрылыс барысын бақылады. Жауапты сала басшыларына нақты тапсырмалар беріліп, жұмыстардың сапалы әрі уақытылы орындалуын қадағалау міндеттелді.
Айта кетейік, Түркістан облысында халықты сапалы ауыз сумен қамту мәселесі облыс әкімдігінің тұрақты бақылауында. Бұл бастамалар Мемлекет басшысының халықтың тұрмыс сапасын арттыру жөніндегі стратегиялық бағытына сай жүзеге асырылып жатыр.



