Түркістан облысының Ордабасы ауданында бүгін кең ауқымды тазалық акциясы өтті. Мемлекет басшысының «Таза Қазақстан» экологиялық бастамасы аясында ұйымдастырылған сенбілік аудан орталығындағы саябақтарды абаттандыруға, санитарлық тазалықты күшейтуге және жергілікті тұрғындар арасында экологиялық мәдениетті арттыруға бағытталды.
Шара барысында Орталық саябақ аумағы күл-қоқыстан толық тазартылып, ағаштар мен көгалдарға күтім жасалды. Қатысушылар жапырақтарды жинап, орындықтар мен жүргіншілер жолдарын жуып-тазалады. Тұрғындар мен еріктілер табиғатты аялау мен қоғамдық аумақтарды күтіп ұстаудың ортақ жауапкершілік екенін көрсетті.
Тазалық жұмыстарына аудан көлеміндегі мекемелер мен ұйымдар, ауылдық округтердің тұрғындары, жастар мен еріктілерден жалпы саны 2000-нан астам адам жұмылдырылды. Жұмыстарға 10 арнайы техника тартылып, нәтижесінде 15 тоннаға жуық тұрмыстық және табиғи қалдықтар арнайы полигонға шығарылды.
Сенбілік аясында табиғатты қорғау, қоршаған ортаны таза ұстау, тұрмыстық қалдықтарды сұрыптау және қайта өңдеу тақырыптарында түсіндіру жұмыстары жүргізілді. Ордабасы ауданы әкімдігі мұндай экологиялық бастамалардың ауданның санитарлық жағдайын жақсартуға ғана емес, тұрғындардың табиғатқа деген жанашырлық сезімін арттыруға зор үлес қосатынын атап өтті.
Алдағы уақытта да аудан аумағында тазалық пен көгалдандыру жұмыстары жүйелі түрде жалғасын табады. «Таза Қазақстан» акциясы – қоршаған ортаны қорғау ісіне ғана емес, қоғамда рухани тазалықты, адалдықты және отансүйгіштік құндылықтарды нығайтуға бағытталған маңызды бастама болып отыр.



