Түркістан облысының Сауран ауданында «Күзгі тазалау» акциясы аясында ауқымды сенбілік ұйымдастырылды. Мемлекет басшысы Қасым-Жомарт Тоқаев биылғы Жолдауында: «Экологиялық мәдениетті күшейту – әрбір азаматтың борышы. Табиғатты қорғау тек мемлекеттік органдардың ғана емес, бүкіл қоғамның ортақ жауапкершілігі болуы керек» деп атап өткен болатын. Осы үндеуді қолдау мақсатында өткізілген тазалық шарасына аудан мекемелері мен ұйымдарының қызметкерлері, ауылдық округтердің тұрғындары мен еріктілер белсене қатысты.
Сенбілік аясында көшелер мен қоғамдық орындар күл-қоқыстан тазартылып, қураған шөптер жиналды. Арнайы техника көмегімен тұрмыстық қалдықтар белгіленген орындарға шығарылды. Жұмысқа 11 техника мен 200-ге жуық тұрғын жұмылдырылып, нәтижесінде 20 тоннаға жуық қоқыс тазартылды.
Аудан әкімдігі мұндай бастамалардың өңірдің санитарлық тазалығын сақтап қана қоймай, қоғамда экологиялық жауапкершілік пен патриоттық сезімді арттыратынын атап өтті. Президент Жолдауында көтерілген міндеттерге сәйкес, алдағы уақытта «Күзгі тазалау» кезеңі аясында ауданның барлық елді мекендерінде тазалық жұмыстары жүйелі түрде жалғасын таппақ.



