Облыс көлемінде жарияланған «World Clean Up Day» халықаралық акциясы аясында Жетісай ауданында «Таза Қазақстан» атты кең ауқымды экологиялық шара өтті. Бұл сенбілік өңірдегі тазалық мәдениетін арттырып қана қоймай, табиғатқа жанашырлық пен туған жерге деген жауапкершілік сезімін нығайтуды мақсат етті.
Акцияға жалпы саны үш мыңға жуық жетісайлық қатысты. Олардың ішінде 205 мемлекеттік қызметші, отызға жуық жергілікті мәслихат депутаттары мен мәслихат аппаратының қызметкерлері, үш жүз ерікті жас және аудан тұрғындары бар. «Тазалық өзімізден басталады» ұранын ұстанған қатысушылар аудан аумағындағы бей-берекет қоқыс орындарын, «Достық» магистральды каналының К-26 арнасын, аудан кіреберісін, «Шардара» су қоймасының Жетісайға қарасты аймағын және қала орталығындағы саябақты тазалады. Сонымен бірге арам шөптер шабылып, жасыл желек өңделді.
Аудан әкімі Серік Мамытов сенбілікке белсенді қатысқан тұрғындарға ризашылығын білдірді.
– «Тазалық – саулықтың кепілі. Әрбір азамат ең алдымен өз ауласын, өз көшесін таза ұстауға дағдыланса, өскелең ұрпаққа туған жерге деген сүйіспеншілік пен жоғары мәдениеттілік үлгісін көрсете аламыз», – деді.
Сенбілік қорытындысында мәдени-спорттық іс-шаралар ұйымдастырылып, қатысушылар көтеріңкі көңіл күйде тарқасты. Тазалық жұмыстарына 26 арнайы техника жұмылдырылып, 110 тоннаға жуық тұрмыстық қалдық Мақталы ауылдық округіндегі полигонға тасымалданды.
Экологиялық мәдениетті қалыптастыру – қоғамның ортақ міндеті. Жетісайлықтардың бұл бастамасы өңір тұрғындарына үлгі болып, табиғатты аялаудың маңызын тағы бір мәрте айқындады.



