Түркістан облысының аудандарында экологиялық мәдениетті қалыптастыруға бағытталған игі істер жалғасуда. Бүгін Созақ ауданы аумағында «Таза Қазақстан» республикалық бағдарламасы мен «World Clean-up Day» Дүниежүзілік тазалық күні аясында кең көлемді жалпыаудандық сенбілік ұйымдастырылды.
Көркейту және көгалдандыру жұмыстары аудан әкімдігінің тұрақты бақылауында. Сенбілік барысында аудан әкімінің орынбасары Серік Маманов орталық көшелер мен әлеуметтік нысандардың аулаларын аралап, қосымша атқарылар жұмыстарды нақтылады. Ол тазалық шараларының маңыздылығын атап өтіп, тұрғындарды қоршаған ортаға жауапкершілікпен қарауға шақырды.
Экологиялық шараға барлық мекеме қызметкерлері, ауыл тұрғындары мен белсенді жастар белсене қатысты. Тазалық жұмыстары кезінде аялдамалар мен ішкі көшелер тұрмыстық қалдықтардан тазартылып, саябақтар мен қоғамдық орындар ретке келтірілді. Бұлақтар мен арық бойлары аршылып, көше бойындағы талдардың түптері әктелді.
Жалпы сенбілікке 2500-ге жуық тұрғын, мекеме қызметкерлері мен жастар жұмылдырылып, 20-ға тарта арнайы техника пайдаланылды. Нәтижесінде көшелер мен аяқ жолдар тазартылып, полигондарға 3,5 тоннадан астам қоқыс шығарылды.
Мұндай шаралар өңірдегі тазалық мәдениетін арттырып қана қоймай, тұрғындардың туған жерге деген қамқорлық сезімін нығайтады. Аудан әкімдігі алдағы уақытта да табиғатты қорғау және көркейту жұмыстары жүйелі түрде жалғасатынын мәлімдеді.



