Кентау қаласына қарасты Байылдыр ауылындағы №9 С.Қожанов атындағы жалпы білім беретін мектепте қоғамдағы діни тұрақтылық пен ұлттық құндылықтарды сақтау мақсатында ақпараттық-түсіндіру жұмыстары жүргізілді. Бұл шараның негізгі мақсаты — теріс діни ағымдардың алдын алу, жастардың діни сауаттылығын арттыру және ұлттық болмыс пен рухани құндылықтарды насихаттау болып табылады.
Кездесуге “Кентау қалалық Руханият орталығы” КММ-нің теолог маманы Ұ.Құлтай мен инспекторы Б.Самбетов қатысты. Мамандар дін мен зайырлылықтың ара-жігін дұрыс түсіну, теріс ағымдардың қоғамға тигізер кері әсері және ұлттық құндылықтарды сақтау мәселелері төңірегінде мазмұнды баяндама жасады.
Теолог мамандар қазіргі заманда теріс діни ағымдардың ақпараттық кеңістікте белсенді әрекет етіп жатқанын атап өтті. Олар жастардың діни сауатты болуы — қоғамның тұрақтылығы мен қауіпсіздігінің басты кепілі екенін түсіндірді. Сонымен қатар, әлеуметтік желілер мен түрлі интернет ресурстарындағы жалған діни үгіт-насихатқа сақтықпен қарау қажеттігі ескертілді.
Кездесу барысында ұлттық құндылықтардың ел бірлігін сақтаудағы маңызына да ерекше назар аударылды. Ұ.Құлтай мен Б.Самбетов жастарға ата-баба дәстүрін қастерлеу, үлкенді құрметтеу, отансүйгіштік пен жауапкершілік сезімін күшейту жайында тағылымды ойлар айтты.
Мектеп ұжымы мен оқушылар бұл кездесуді үлкен қызығушылықпен қабылдап, мамандарға өздерін толғандырған сұрақтарын қойды. Мұндай ақпараттық-түсіндіру шаралары жастардың діни сауаттылығын арттырумен қатар, ел ішінде тұрақтылық пен бірлікті сақтауға елеулі үлес қосады.



