Қазақ халқы ежелден бірлікті береке, ынтымақты ырыс деп бағалап келеді. Бірліктің арқасында ел еңсесін тіктеп, мемлекеттігін нығайтты. Бүгінде бірлік – тәуелсіз еліміздің ең басты құндылықтарының бірі. Қоғамдағы тұрақтылық пен татулық ел дамуының кепілі болып табылады. Ел бірлігі – ұлттың тұтастығын, мемлекетіміздің мызғымас іргетасын қалыптастыратын басты фактор.
Қазіргі таңда мемлекетіміз әлеуметтік-экономикалық тұрғыдан ілгері жылжып, даму жолында нақты жетістіктерге қол жеткізіп келеді. Бұл жетістіктердің негізінде ел азаматтарының ауызбіршілігі мен татулығы жатыр. Мемлекет басшысы Қасым-Жомарт Тоқаев өзінің Жолдауларында ел ішіндегі тұрақтылықты сақтау, ынтымақ пен келісімді нығайту мәселелеріне әрдайым ерекше назар аударады. Президенттің «Береке бастауы – бірлік» деген сөзі барша қазақстандықтың жүрегінен орын алғаны анық. Бұл – елдік мүддеге қызмет етудің айқын көрінісі.
Еліміздегі этносаралық келісім мен конфессияаралық татулық – тәуелсіздіктің басты жетістіктерінің бірі. Түркістан өңірінде де түрлі этнос өкілдері бір шаңырақ астында тату-тәтті өмір сүріп келеді. Өңірде қоғамдық келісімді сақтау бағытында жүйелі жұмыстар жүргізілуде. Ұлт пен ұлыс өкілдері мемлекеттік бағдарламаларға белсене атсалысып, өңірдің дамуына өз үлестерін қосуда. Бұл – ортақ мақсат жолындағы бірліктің шынайы көрінісі.
Қоғамның тұрақтылығы ең алдымен ел азаматтарының өзара сыйластығы мен құрметіне байланысты. Халық арасында түсіністік пен ынтымақ болған жағдайда ғана мемлекеттің дамуы тұрақты болмақ. Ел бірлігін сақтау – тек мемлекеттік құрылымдардың ғана емес, әрбір азаматтың парызы. Жастарға татулық пен бауырмалдықтың маңызын түсіндіру, елге деген сүйіспеншілікті арттыру – келешекке деген сенімді нығайтады. Осы бағытта мектептерде, жоғары оқу орындарында, мәдени ошақтар мен қоғамдық ұйымдарда түрлі іс-шаралар ұйымдастырылып келеді.
Түркістан облысында жыл сайын көптеген мерекелік және мәдени шаралар өткізіліп, этностар арасындағы достық пен бірлік нығайтылып келеді. Бұл бағытта Қазақстан халқы Ассамблеясы облыстық филиалы маңызды рөл атқарады. Ассамблея жанындағы этномәдени бірлестіктердің белсенділігі қоғамдағы өзара түсіністік пен келісімді арттыруға елеулі үлес қосуда. Олар мемлекеттік тіл мен мәдениетті құрметтеуге, ұлттық құндылықтарды дәріптеуге және елдік бірлікті сақтауға ерекше көңіл бөледі.
Сондай-ақ, қоғамдық келісімді сақтауда жергілікті билік пен азаматтық қоғамның өзара ықпалдастығы маңызды рөлге ие. Бірлесе атқарылған жұмыстардың нәтижесінде өңірде түрлі дін өкілдері мен этнос топтарының арасындағы татулық нығайып келеді. Бұл ел дамуына тікелей ықпал ететін оң үрдіс. Өйткені елдің дамуы ең алдымен тұрақтылыққа, ал тұрақтылық – бірлік пен келісімге негізделеді.
Қазіргі жаһандану дәуірінде ел бірлігін сақтау бұрынғыдан да маңызды. Әлемде түрлі сын-қатерлер көбейген сәтте, қоғамдағы бірлік пен татулық елдің болашағын айқындайтын шешуші күшке айналады. Сол себепті мемлекетіміз ұлттық бірегейлікті сақтау мен нығайтуға айрықша назар аударып отыр. Бұл ретте елдің әр азаматы ел бірлігін сақтауға өз үлесін қосуы қажет.
Қорыта айтқанда, ел бірлігі – тәуелсіз Қазақстанның ең басты тірегі. Бірлігі жарасқан елдің болашағы жарқын, бағыты айқын болады. Сондықтан татулық пен келісімді сақтау – баршамыздың ортақ міндетіміз. Бірлігіміз бекем болса, еліміздің іргесі де мығым болары сөзсіз.



