Кентау трансформатор зауыты – еліміздің электр техникасы саласындағы ірі өндірістік кәсіпорындардың бірі. Жарты ғасырдан астам уақыт бойы бұл зауыт ел экономикасының энергетикалық жүйесін тұрақты қамтамасыз етіп келеді. Өндірістік желілердің үздіксіз жұмыс істеуі, шығатын өнімнің сапасы мен сенімділігі – онда еңбек етіп жүрген мыңдаған мамандардың жауапкершілігі мен кәсібилігінің нәтижесі. Солардың қатарында ұзақ уақыт осы кәсіпорында еңбек етіп келе жатқан жұмысшылардың бірі – Үсен Қонысбаев.
Ол Кентау трансформатор зауытында 20 жылдан бері оператор болып жұмыс істеп келеді. Өндіріс саласына алғаш келген күннен бастап ол осы күрделі әрі маңызды істің қыр-сырын меңгеріп, білікті маманға айналған. Қазіргі таңда өндіріс жүйесінің барлық кезеңін қадағалайды. Трансформатор құрастырудың бастапқы процесінен соңғы сынаққа дейінгі әрбір сатылы жұмыс бақылаудан өтеді.
Үсен Қонысбаев осы талаптардың орындалуын ұдайы назарда ұстайды, тәжірибесі аз қызметкерлерге бағыт-бағдар беріп отырады. Ол еңбек ететін ауысымда 16 адам жұмыс істейді. Үсен Қонысбаев сияқты ұзақ жылдар бойы бір салада еңбек еткен мамандардың тәжірибесі зауыт үшін де, жас қызметкерлер үшін де үлкен мектеп. Кентау трансформатор зауытының бүгінгі жетістігі – осындай қарапайым еңбек адамдарының еңбегі.
