Жол-көлік оқиғасына байланысты пікір білдірген «Азаматтарға арналған үкімет» мемлекеттік корпорациясы аталған оқиғаның 19 қаңтарда Шымкент қаласындағы №4 мамандандырлыған ХҚКО аумағында орын алғанын хабарлады.
Практикалық емтихан тапсыру кезінде жүргізуші куәлігін алуға келген үміткер тапсырмалардың бірін орындау барысында көлік құралын басқаруда қателік жіберіп, соның салдарынан көлік аударылып кеткен.
Оқиға орнында мамандандырылған ХҚКО қызметкерлері тарапынан алғашқы медициналық көмек көрсетіліп, 103 нөмірі арқылы жедел медициналық жәрдем шақырылған. Үміткердің жағдайы дәрігерлер тарапынан қанағаттанарлық деп бағаланды.
Корпорация таратқан мәліметке сүйенсек, аталған оқиға мемлекеттік қызмет көрсету процесіне әсер еткен жоқ. Қазіргі уақытта практикалық емтихандар штаттық режимде қабылданып жатыр.
— Еске саламыз, практикалық емтиханға автомектептерде оқудан өткен, көлік құралын басқаруға дайындығын растаған және тапсырмаларды өз бетінше орындауға қабілетті тұлғалар ғана жіберіледі, — делінген “Азаматтарға арналған үкімет” мемлекеттік корпорациясының Байланыс қызметі таратқан ақпаратта.
