Мемлекет басшысы Қасым-Жомарт Тоқаев судың бүкіл тіршіліктің көзі ғана емес, әлемдегі барлық ел үшін аса маңызды стратегиялық ресурс екенін үнемі айтып келеді. «Су, дұрыс пайдалана білсең – құт, ысырап етсең – жұт», – деген Президент сөзі бүгінгі таңда ерекше маңызға ие.
Қазақстан үшін су мәселесін ұлттық қауіпсіздік мәселесі деуге толық негіз бар. Сондықтан бұл сала әрдайым мемлекеттің айрықша назарында. Мемлекет басшысы 2023 жылғы «Әділетті Қазақстанның экономикалық бағдары» атты Жолдауында суды тиімді пайдалану мәселесіне арнайы тоқталып, саланы түбегейлі реформалау қажеттігін атап өтті. Соның нәтижесінде елімізде Су ресурстары және ирригация министрлігі құрылып, нақты міндеттер айқындалды. Жаңа Су кодексі қабылданып, ірі инфрақұрылымдық жобалар жүзеге асырылуда. Су нысандарын салу және қалпына келтіру үшін қомақты қаржы бөлініп, жүйелі жұмыстар қолға алынды.
Бұл бастамалар өңірлерде нақты істермен жалғасын табуда. Соның бір дәлелі ретінде Келес ауданында су шаруашылығы нысандарын жаңғырту бағытында атқарылып жатқан кешенді жұмыстарды айтуға болады. Аудан әкімі Жәнібек Ағыбаевтың тұрғындармен өткізген есептік кездесулерінде көтерілген негізгі мәселелердің бірі – егістік алқаптарды ағын сумен тұрақты қамтамасыз ету болатын. Бүгінде бұл мәселе кезең-кезеңімен өз шешімін табуда.
Аудандық коммуналдық меншіктегі ұзындығы 18 шақырымды құрайтын Саңырау, 24,5 шақырым Шошым және 7,7 шақырым Игілік каналдарын бетонмен қаптау үшін жобалық-сметалық құжаттар әзірленіп, мемлекеттік сараптамадан өтті. Аталған жобаларды «Ислам Даму» банкінің бірінші және екінші кезеңдері аясында қаржыландыру жоспарланған. Биылғы жылдың екінші жартысында Саңырау каналын бетондау жұмыстары басталмақ.
Сонымен қатар, жалпы ұзындығы 127,9 шақырым болатын Тартулы, Араншы-2, Бес-Абдал, Ошақты, Оймауыт, 8-Ұлан, Жаңа-Қият, Үш-Ағаш, Теріс және Р-28 каналдарын бетонмен қаптау үшін облыстық бюджеттен 103 миллион теңге бөлінді. Қазіргі уақытта бұл жобаларға қажетті жобалық-сметалық құжаттар әзірленуде.
2026 жылғы суғару маусымын сапалы өткізу, егістік жерлердің мелиоративтік жағдайын жақсарту және су тасқынының алдын алу мақсатында жалпы ұзындығы 218,5 шақырымды құрайтын 68 су нысанын механикалық тазалау жоспарланған. Оның ішінде 41 каналдың ұзындығы 141,5 шақырымды, ал 27 каналдың ұзындығы 77 шақырымды құрайды.
Аталған жұмыстарды атқару үшін облыстық «Тұран-су» мекемесінен 4 шынжыр табанды экскаватор және аудандық су шаруашылығы мекемесінен 1 арнайы техника тартылып, барлығы 5 техника жұмылдырылды. Қазіргі таңда Біртілек және Алпамыс батыр ауылдық округтеріндегі қашыртқыларда тазалау жұмыстары жүргізілуде.
Жүргізіліп жатқан кешенді шаралардың нәтижесінде 6 988 гектар егістік жерге су жеткізу мүмкіндігі артып, 1 900 гектар алқаптың мелиоративтік жағдайы жақсарады. Бұл өз кезегінде Келес ауданында ауыл шаруашылығы саласының дамуына серпін беріп, шаруалардың тұрақты әрі сапалы өнім алуына жол ашады.
Су ресурстарын тиімді басқару мен инфрақұрылымды жаңғырту бағытындағы бұл жұмыстар Мемлекет басшысы айқындаған стратегиялық міндеттердің жергілікті жерде нақты іске асып жатқанын көрсетеді. Су – елдің болашағы, ал оны сақтау мен тиімді пайдалану – ортақ міндет.
