Қарттарға қамқорлық көрсету, олардың белсенді әрі мәнді өмір сүруіне жағдай жасау – мемлекет жүргізіп отырған әлеуметтік саясаттың маңызды бағыттарының бірі. Өйткені, қоғамның дамуы тек жастармен ғана емес, өмірлік тәжірибесі мол, елдің дамуына ұзақ жылдар бойы үлес қосқан аға буынның әл-ауқатымен де тікелей байланысты. Мемлекет бұл бағытта зейнет жасындағы азаматтардың өмір сапасын арттыруға, денсаулығын нығайтуға және қоғам өміріне белсенді араласуына мүмкіндік беретін жүйелі шараларды жүзеге асырып келеді.
Соңғы жылдары елімізде зейнеткерлерге арналған белсенді өмір сүру орталықтарының танымалдығы арта бастады. Мұндай орталықтар Қазақстанның барлық өңірлерінде, ірі қалаларында 2021 жылдан бастап кезең-кезеңімен ашылып, аға буын өкілдері үшін жаңа мүмкіндіктер алаңына айналды. Бұл бастама қарт адамдардың күнделікті өмірін мазмұнды етіп қана қоймай, олардың әлеуметтік оқшаулануын азайтуға, денсаулықтарын сақтауға және өз әлеуетін қоғам игілігіне пайдалануға жол ашты.
Осы бағыттағы нақты жұмыстар Түркістан қаласында да табысты жүзеге асырылып келеді. Қалада зейнет жасындағы азаматтардың өмір сапасын арттыру, белсенді ұзақ өмір сүруіне жағдай жасау мақсатында Белсенді ұзақ өмір орталығы жүйелі түрде жұмыс істеуде. Бүгінде орталық қала аумағында орналасқан үш бөлім арқылы тұрғындарға қызмет көрсетуде. Бұл бөлімдер жыл сайын шамамен 5 000 зейнеткерді әлеуметтік, мәдени және сауықтыру бағытындағы түрлі қызметтермен қамтып отыр.
Белсенді ұзақ өмір орталығында зейнеткерлер үшін дене белсенділігін арттыруға арналған жаттығулар, сауықтыру гимнастикасы, серуендеу мен спорттық бағыттағы іс-шаралар ұйымдастырылады. Сонымен қатар, аға буын өкілдерінің бос уақытын тиімді өткізуіне жағдай жасалып, шығармашылық үйірмелер, мәдени-көпшілік іс-шаралар мен танымдық кездесулер тұрақты түрде өткізіліп келеді. Бұл шаралар зейнеткерлердің өмірге деген қызығушылығын арттырып, өзара қарым-қатынасын нығайтуға ықпал етуде.
Орталықтың маңызды бағыттарының бірі – зейнеткерлердің қоғаммен тығыз байланысын сақтау. Мұнда олар өз ой-пікірлерін ортаға салып, тәжірибелерімен бөлісуге, қоғамдық бастамаларға қатысуға мүмкіндік алады. Мұндай белсенділік аға буын өкілдерінің өзін қоғамның ажырамас бөлігі ретінде сезінуіне, рухани және психологиялық тұрғыдан сергек болуына септігін тигізеді.
Белсенді ұзақ өмір орталығы – зейнеткерлердің әлеуетін арттыруға, олардың өмірге деген құлшынысын күшейтуге және әлеуметтік қолдауды кеңейтуге бағытталған маңызды әлеуметтік жоба. Бұл орталықтардың жұмысы өңірдің әлеуметтік инфрақұрылымын нығайтып қана қоймай, қоғамдағы ұрпақтар сабақтастығын қалыптастыруға да ықпал етеді.
Түркістан қаласында аға буынға арналған осындай әлеуметтік жобалардың жүзеге асырылуы өңірдің әлеуметтік-экономикалық тұрғыдан тұрақты дамып келе жатқанын көрсетеді. Қарттарға қолайлы орта қалыптастыру, олардың денсаулығы мен белсенді өмірін қолдау қоғамның үйлесімді дамуына негіз болатын маңызды қадам. Бұл бағыттағы жүйелі жұмыстар алдағы уақытта да жалғасын тауып, тұрғындардың өмір сапасын арттыруға қызмет ететіні сөзсіз.
