Мемлекет басшысы Қасым-Жомарт Кемелұлы Тоқаев «Әділетті Қазақстанның экономикалық бағыты» атты Жолдауында өңірлердің транзиттік әлеуетін арттыруға, жаңа жолдар мен теміржол бағыттарын дамытуға ерекше мән беруді тапсырған болатын. Осы міндеттің жүзеге асырылуы аясында Түркістан облысында стратегиялық маңызы бар «Дарбаза – Мақтаарал теміржол желісінің құрылысы» жобасы қарқынды жүргізіліп жатыр.
Жобаны толық іске қосу 2026 жылдың желтоқсан айына жоспарланған. Құрылыс алаңындағы жұмыстар қатаң бақылауға алынған. Нысанды «Қазақстан темір жолы» ҰК» АҚ тапсырысымен «Integra Construction KZ» ЖШС жүзеге асыруда.
Түркістан облысының әкімі Нұралхан Көшеров «Қазақстан темір жолы» ҰК» АҚ құрылыс жөніндегі басқарушы директоры Марат Исқалиев және жобаны іске асырушы мердігер ұйым өкілдерімен кездесті. Кездесу барысында құрылыс барысының қазіргі жай-күйі баяндалып, туындаған өзекті мәселелер мен шешу жолдары талқыланды.
Облыс әкімі жауапты тұлғаларға жұмыстарды жеделдетіп, барлық тапсырмаларды белгіленген мерзімде әрі сапалы орындауды қатаң тапсырды.
«ҚТЖ» ҰК АҚ құрылыс жөніндегі басқарушы директоры Марат Исқалиевтің мәліметінше, қазіргі уақытта аяқталған жер қазу жұмыстарының жалпы көлемі 9,1 млн текше метрді құрайды. 19,8 шақырымға рельсті шпал торы төселген және көпірлер мен өткелдер, су құбырлары мен жасанды құрылымдарды монтаждау жұмыстары қарқынды жүргізілуде.
Жаңа теміржол желісінің ұзындығы 172 шақырымды құрайды.
«Дарбаза – Мақтаарал» теміржол желісінің негізгі мақсаты – жүк және жолаушылар тасымалы көлемін арттыру, транзиттік тасымалдарды ашу, жаңа бағыттарды іске қосу. Сондай-ақ, Түркістан – Шымкент – Ташкент учаскесіндегі өткізу қабілетін тәулігіне 35 жұп поезға дейін ұлғайту.
