Түркістан облысы әкімінің орынбасары Нұрбол Тұрашбеков Келес ауданына жұмыс сапарымен барып, аудан әкімі Жәнібек Ағыбаевпен бірге фитосанитарлық ахуалды тұрақтандыру мәселелері бойынша кеңейтілген жиын өткізді. Онда 2026 жылы үйірлі шегірткелерге қарсы жүргізілетін химиялық өңдеу және алдын алу шараларының кешенді жоспары талқыланды. Аудан әкімінің орынбасары Сүлеймен Жылқыбаев дайындық барысы туралы баяндап, нақты жоспарлар мен ұйымдастыру жұмыстарына тоқталды.
Мамандардың мәліметінше, алдағы кезеңде аудан бойынша жалпы көлемі 143 350 гектар жерге химиялық өңдеу жүргізіледі. Бұл аумақ 19 секторға бөлініп, жұмыстарды үйлестіруге ауыл шаруашылығы министрлігіне қарасты мекемелердің 19 маманы және жергілікті атқарушы органнан 38 өкіл жауапты болып бекітілген. Далалық жұмыстарға 220 анықтаушы маман, 44 арнайы автокөлік жұмылдырылады. Сондай-ақ, жұмысшылар үшін 23 жатын орын дайындалған.
Ең ауқымды өңдеу жұмыстары Бірлік ауылдық округінде – 44 100 гектарға, Жамбыл ауылдық округінде – 44 100 гектарға, Бозай ауылдық округінде – 39 600 гектар аумақта жүргізілетін болады. Сонымен қатар, Қошқарата, Біртілек, Ошақты және Ақтөбе ауылдық округтеріндегі фитосанитарлық жағдайға ерекше назар аударылады. Жиыннан кейін жұмыс тобы Ақтөбе және Жүзімдік ауылдық округтеріне барып, алқаптардың нақты жағдайымен танысты.
