Елімізде волонтерлік қызмет — азаматтық қоғамды дамытудың маңызды құрылымына айналуда. Мәселен, 2020 жылы елімізде еріктілер саны 50 000 болса, 2025 жылы бұл көрсеткіш 300 000-ға жеткен. Ал, волонтерлік ұйымдар саны 2020 жылы 224 болса, өткен жылы 810 болды. Бұл жайында Айбек Досымбетов БАҚ өкілдерімен өткен брифингте мәлімдеді.
«Соңғы 6 жылда Қазақстандағы волонтерлік қозғалыс айтарлықтай дамып, тұрақты өсім көрсетуде. Жыл сайын 60 000-нан астам жас Ұлттық волонтер желісіне тартылады. Ал, аталған салада 8 негізгі жоба жүзеге асырылса, қазіргі таңға дейін 200-ден астам адам «Жыл волонтері» халықаралық сыйлығының лауреаты атанған» — деді Айбек Аяпбергенұлы.
Сонымен қатар, Түркістан облысында 149 волонтерлік ұйым тіркелсе, 24 298 жас ерікті еңбек етуші болып анықталған. Өткен жылы мемлекеттік жастар саясатын жүзеге асыру мақсатында 7 225 іс-шара өткізіліп, 625 280 жас қамтылған. Ал, биыл жыл басынан бері 193 559 жас қамтылған 1991 шара өткен. Бұл жайында Түркістан облыстық «Жастар ресурстық орталығы» КММ басшысының орынбасары Дінислам Бимаханбетов хабардар етті.
«2026 жылы республикалық деңгейде волонтерлік бағыт аясында бірқатар іс-шаралар ұйымдастыру жоспарлануда. Атап айтар болсақ, республикалық «ZHAS CAMP» лагерін және «Asyl mura» волонтерлік әлеуметтік жобалар байқауы және «Jas saq» этно-реалити шоуы өткізілмек. Сондай-ақ, «Ясауи әлемі» атты квест сайысын және «Білімді жастар — ел ертеңі» атты жас көшбасшылар жобасын ұйымдастыру жоспарлануда. Аталған іс-шаралардың барлығына да дайындық жұмыстары басталып кетті»- деді спикер.
