Астана қаласында 17-23 сәуір күндері өткен «Ұлттық мектеп» лигасында Түркістан облысының оқушылары жоғары нәтиже көрсетті. Атап айтқанда, ұлдар арасында гандболдан «Ұшқыр доп» сайысында өңір намысын қорғаған оқушылар ел чемпионы атанды. Сонымен қатар, қыздар арасында футболдан «Былғары доп» жарысында Түркістан облысының командасы ІІІ орынға қол жеткізіп, жүлдегерлер қатарынан табылды.
Ұлттық мектеп лигасы жас спортшылардың қабілетін шыңдап қана қоймай, салауатты өмір салтын қалыптастыруда, достық пен бәсекелестік рухты дамытуда ерекше маңызға ие. Түркістандық жас өрендердің бұл жеңісі – өңір спортының дамып келе жатқанының айқын дәлелі.
