Мемлекет басшысы Қасым-Жомарт Тоқаев бастамашы болған «Таза Қазақстан» экологиялық акциясы аясында еліміздің барлық өңірлерінде қоршаған ортаны қорғау, тарихи-мәдени нысандарды күтіп ұстау және елді мекендерді абаттандыру бағытындағы жұмыстар жүйелі түрде жалғасуда. Бұл бастама тұрғындардың экологиялық мәдениетін қалыптастырып қана қоймай, ұлттық мұраға деген жанашырлықты арттыруға да ерекше серпін беріп отыр.
Жақында Отырар ауданындағы киелі орындар аумағында ауқымды тазалық жұмыстары ұйымдастырылды. Игі шараға аудан аумағындағы кәсіпорындар мен қоғамдық, бюджеттік ұйымдардың қызметкерлері, Отырар мемлекеттік археологиялық музей-қорығы ұжымы және аудан тұрғындары қатысып, жалпы саны 500-ге жуық адам жұмылдырылды.
Сенбілік барысында Арыстанбаба кесенесі аумағы мен Отырар төбе қалажұрты маңы тазартылып, ретке келтірілді. Сонымен қатар, айналадағы табиғи шөптер шабылып, аумақтың санитарлық жағдайын жақсарту жұмыстары жүргізілді.
Тазалық шарасына 4 арнайы техника тартылып, нәтижесінде 2,6 тонна қоқыс арнайы белгіленген аумаққа шығарылды. Бұдан бөлек, көше бойындағы ағаштардың қураған бұтақтары қырқылып, түптері қопсытылып, әктеу және көшет отырғызу жұмыстары атқарылды.
Ұйымдастырушылардың айтуынша, тарихи-мәдени нысандарды күтіп ұстау – тек тазалық сақтау ғана емес, ұлттық құндылықтарға деген құрметтің көрінісі. Әсіресе, туристер жиі келетін киелі орындардың таза әрі көрікті болуы өңірдің мәдени-рухани келбетін айқындай түседі.
Бүгінде тарихи ескерткіштер мен мәдени кеңістіктерді сақтау – қоғам алдындағы маңызды міндеттердің бірі. Осы бағытта мәдени мұра нысандарын қорғау, оларды күтіп-ұстау және абаттандыру жұмыстары алдағы уақытта да тұрақты түрде жалғасын табатын болады.
