Мемлекет басшысы Қасым-Жомарт Тоқаев Қазақстан халқына арнаған Жолдауларында аграрлық саланы дамыту, еңбек өнімділігін арттыру және ауыл шаруашылығы өнімдерінің экспорттық әлеуетін күшейту мәселесіне ерекше назар аударып келеді. Осы бағытта Түркістан облысының шаруалары көктем шыға мол өнім қамын жасап, бүгінде алғашқы нәтижелерге қол жеткізуде.
Өңірдің өзге аймақтарында көктемгі егіс науқаны енді қарқын алып жатқан тұста Сарыағаш ауданының диқандары ерте егілген дақылдардың алғашқы өнімін жинауға кірісті. Биыл аудан шаруалары 9 мың гектардан астам жерге көкөніс дақылдарын еккен. Соның ішінде қыс мезгілінде егілген қырыққабат толық пісіп жетіліп, ішкі және сыртқы нарыққа жөнелтіле бастады.
Сарыағаштық шаруалар биыл ерте піскен қырыққабаттан мол өнім алуда. Орта есеппен алғанда диқандар 40 соттық жерден 40 тоннаға дейін өнім жинап отыр. Солардың бірі – «Бадалов Амирхан» шаруа қожалығы. Қожалық иелері қаңтар айында еккен қырыққабат өнімін бүгінде толық жинап үлгерген. Диқандардың айтуынша, ерте егілген қырыққабат шамамен үш ай ішінде пісіп жетіледі. Биылғы ауа райының қолайлы болуы мен су тапшылығының болмауы өнім сапасына оң әсер еткен.
Шаруалар қазір жиналған өнімді жергілікті нарықпен қатар өзге өңірлерге де жөнелтіп жатыр. Ерте піскен көкөніске сұраныстың жоғары болуы диқандардың табысын арттырып, көктемгі маусымды сәтті бастауына мүмкіндік беруде.
Сарыағаш ауданының табиғи-климаттық ерекшелігі ерте өнім алуға өте қолайлы. Сондықтан аудан шаруалары жыл сайын ерте көкөніс өсіруде тәжірибесін жетілдіріп, өнім көлемін арттырып келеді.
