Экологиялық мәдениетті қалыптастыру, қоршаған ортаны қорғау және өскелең ұрпақтың табиғатқа жауапкершілікпен қарауы ел болашағы үшін аса маңызды міндеттердің бірі болып табылады. Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» бағдарламасы бүгінде осы бағыттағы жүйелі жұмыстардың негізіне айналған.
Аталмыш бағдарлама аясында Түркістан қаласындағы №32 «Келешек» мектебі алаңында «Эко-Трак» жобасы таныстырылды. Бұл жоба экологиялық мәдениетті қалыптастыруға, қалдықтарды сұрыптау мен қайта өңдеу ісін кеңінен насихаттауға бағытталған.
«Эко-Трак» – KATKO компаниясының бастамасымен Созақ ауданының 5 мектебінде жүзеге асырылатын «Жасыл мектеп» бағдарламасының маңызды құрамдас бөлігі. Мобильді жобаның ресми таныстырылымына облыс әкімінің орынбасары Ертай Алтаев, «Жасыл мектеп» жобасының негізін қалаушы Евгений Мұхамеджанов, облыстық білім басқармасы басшысының орынбасары Айгүл Қасымбекова және БАҚ өкілдері мен мектеп оқушылары қатысты.
Іс-шара барысында Ертай Кенжебекұлы жобаның маңыздылығына тоқталып, экологиялық тәрбиенің маңызына ерекше назар аударды.
— Бүгінде экологияны сақтау, қалдықтарды тиімді кәдеге жарату – уақыт талабы. Бұл жоба балаларға қалдықтарды сұрыптау мен қайта өңдеу мәдениетін үйретуге бағытталған. Ол тек теория емес, нақты тәжірибе арқылы жүзеге асады. Оқушылар қалдықтарды қайта өңдеу процесін өз көзімен көріп, экологиялық жауапкершілікті іс жүзінде меңгереді, — деді Ертай Кенжебекұлы.
Ертай Кенжебекұлының айтуынша, мұндай бастамалар еліміздің бірнеше өңірінде сәтті жүзеге асып, мемлекеттік деңгейде қолдау тауып отыр. Ендігі кезекте жоба Созақ ауданы мектептерінде де жалғасын тауып, оқушылардың экологиялық сауатын арттыруға ықпал етпек.
Айта кетейік, іс-шара барысында №32 «Келешек» мектебінің оқушылары өз қолдарымен жасаған бұйымдар көрмесін ұсынды. Көрмеге бейнелеу өнері туындылары мен қолөнер бұйымдары қойылып, көпшілік назарына ұсынылды. Бұл оқушылардың шығармашылық қабілетін дамытып қана қоймай, экологиялық және эстетикалық тәрбиені ұштастыруға мүмкіндік берді.
