Мемлекет басшысы Қасым-Жомарт Тоқаев өз Жолдауларында «Халық үніне құлақ асатын мемлекет» тұжырымдамасын басты басымдықтардың бірі ретінде айқындап, мемлекеттік органдардың азаматтармен тікелей байланысын күшейтуді тапсырған болатын. Осы бағыттағы жұмыстар Түркістан облысында жүйелі түрде жалғасып келеді.
Осы орайда Түркістан облысы әкімінің орынбасары Қанат Қайыпбек өңір тұрғындарын жеке қабылдап, азаматтардың өтініштері мен ұсыныстарын тыңдады. Қабылдау барысында тұрғындар жер телімдерін заңдастыру, олардың нысаналы мақсатын өзгерту және өзге де өзекті мәселелерді көтерді.
Қанат Қайыпбек азаматтардың әрбір өтініші назардан тыс қалмайтынын айтып, тұрғындардың мәселелерін дер кезінде әрі заң аясында шешудің маңыздылығына тоқталды. Сонымен қатар жауапты басқармаларға көтерілген мәселелерді жан-жақты зерделеп, әрбір өтініш бойынша заң талаптарына сәйкес нақты шешім қабылдауды міндеттеді.
Сондай-ақ азаматтарға уақтылы кері байланыс беру, түсіндіру жұмыстарын күшейту және тұрғындармен ашық диалог орнату қажеттігі атап өтілді. Бұл бағыттағы жұмыстар халықтың билікке деген сенімін арттырып, өңірдегі әлеуметтік мәселелердің тиімді шешілуіне ықпал етеді.
Айта кетейік, Түркістан облысы әкімдігі тарапынан тұрғындарды жеке қабылдау жұмыстары тұрақты түрде жүргізілуде. Облыс әкімі мен оның орынбасарлары бекітілген кестеге сәйкес азаматтарды қабылдап келеді. Жеке қабылдауға eOtinish бірыңғай базасы арқылы немесе Азаматтарды қабылдау орталығына барып жазылуға мүмкіндік бар.
