Мемлекет басшысы ауылды көркейту, ауылдық аумақтарды дамыту мәселесіне әрдайым ерекше мән беріп келеді. Өйткені, ауылдың дамуы – елдің дамуы. Бұл бағыттағы жұмыстар мемлекет саясатының басым бағыттарының бірі болып табылады. Жақында Отырар ауданының әкімі Қайрат Жолдыбайұлы Қарғалы ауыл округінің халқымен кездесіп, атқарылып жатқан жұмыстар мен алдағы жоспарлар туралы баяндады. Кездесу барысында ауыл шаруашылығы, инфрақұрылым және әлеуметтік даму бағытындағы бірқатар маңызды жобалар сөз болды.
Аудан әкімінің айтуынша, Қарғалы ауыл округінде ауыл шаруашылығы саласы тұрақты дамып келеді. Бүгінде жалпы көлемі 4780 гектар жерге егіс егілген. Бұл ауыл еңбеккерлерінің белсенділігін және аграрлық сектордың әлеуетінің жоғары екенін көрсетеді.
Суармалы егіншілікті дамыту мақсатында Д. Алтынбеков каналының 10,7 шақырымын бетонмен қаптау жұмыстары басталған. Жоба толық аяқталған жағдайда ауылдағы ағын су мәселесін шешіп, егістік алқаптарын тұрақты сумен қамтамасыз етуге мүмкіндік береді.
Мал шаруашылығы саласында да оң өзгерістер байқалады. «Ауыл аманаты» бағдарламасы аясында 11 отбасы жеңілдетілген несие алып, ауылға 116 бас ірі қара мал әкелінген. Бұл ауыл тұрғындарының табысын арттырып, жеке кәсіпкерлікті дамытуға жол ашып отыр.
Инфрақұрылым бағытында да бірқатар жұмыстар атқарылған. «Ауыл – Ел бесігі» бағдарламасы аясында ауыл көшелеріне асфальт төселіп, жарықтандыру жүйелері жаңартылды. Сонымен қатар балалар ойын алаңшасы салынып, елді мекеннің әлеуметтік жағдайы жақсара түсті.
Кездесу барысында аудан әкімі алдағы уақытта ауыл инфрақұрылымын одан әрі дамыту, көгалдандыру жұмыстарын жалғастыру, ауыл шаруашылығы саласын күшейту және тұрғындардың өмір сүру сапасын арттыру бағытындағы жұмыстар кезең-кезеңімен жүзеге асатынын атап өтті.
