27 мамыр – Құрбан айт мейрамының алғашқы күні. Осыған орай Түркістан облысының мешіттерінде мерекелік іс-шаралар өтеді. Атап айтқанда, мешіт имамдары ұлттық нақышта киініп, мерекелік дастарқан жайылып және ұлттық ойындар ұйымдастырылады. Бұл туралы өңірлік коммуникациялар қызметінде өткен брифингте Түркістан облысының бас имамы Ержан Төлепов айтты.
– Құрбан айт мейрамы биыл 27-29 мамыр аралығында атап өтіледі. Құрбан шалудың уақыты 27 мамыр күні айт намазы оқылып болғаннан кейін басталса, аяқталуы 29 мамыр кешкі ақшам намазына дейін жалғасады. Яғни, аталмыш уақыттан тыс құрбан шалуға, уақытынан ерте және кешігіп те қалуға болмайды. Айт намазы Түркістан облысында сағат таңғы 6:00-да басталады, — деді Ержан Сматұлы.
Сондай-ақ, брифинг барысында Түркістан қаласының бас имамы Исмаил Панов құрбандыққа қандай мал жарамды екенін айтып, шаруаларды айт күндері мал бағасын тұрақты ұстауға шақырды.
– Айт мейрамында кәсіпкерлерді мал бағасын шарықтатпай, пайдаға емес, сауапқа бөленуге шақырамыз. Қала тұрғындары құрбан шалу барысында санитарлық нормаларды қатаң сақтауы тиіс. Айт күндері аз да болса садақа беріп, қараусыз қалған қарттарға, жетімдер мен көпбалалы отбасыларға көңіл бөлу – сауапты іс. Құрбандыққа 1 жасар қой-ешкі, 2 жасар сиыр, 5 жасар түйе шалынады. Сойылатын мал арық, ақсақ, соқыр, құлақсыз шұнақ, мүйізі сынған болмауы керек. Әртүрлі кемшіліктерден ада, толыққанды түлік болуы тиіс. Айта кетейік, қазіргі таңда облыс орталығында 200-ге жуық мұқтаж отбасы анықталып, 21 ірі қара мал, 2 түйе мен 4 қой сойылады деп жоспарланып отыр. Алдағы уақытта бұл өсуі де мүмкін, — деді Исмаил Ыдырысұлы.
Сондай-ақ, брифингте Түркістан облыстық дін істері басқармасының бөлім басшысы Сүндет Жүсіпбек Құрбанның айтуынша, айт мейрамы қарсаңында өңірдегі қасапшылармен арнайы жиын өтіп, оларға түсіндірме жұмыстары жүргізілген. Онда малды шариғат талаптарына сай сою және санитарлық талаптарды сақтау және өзге де мәселелер талқыланған.
