Мемлекет басшысы Қасым-Жомарт Тоқаев еліміздің экономикалық дамуының негізгі бағыттарының бірі ретінде өңдеу өнеркәсібін дамытуға және жаңа өндіріс орындарын ашуға ерекше мән беріп келеді. Президент Үкімет пен жергілікті атқарушы органдарға инвестиция тарту, өндірістік инфрақұрылымды жетілдіру және тұрақты жұмыс орындарын құру бағытындағы жұмыстарды күшейтуді тапсырған болатын. Бұл міндеттер өңірлерде жаңа индустриялық жобаларды іске асыру арқылы кезең-кезеңімен жүзеге асырылуда.
Соңғы жылдары Түркістан қаласы тек рухани және туристік орталық ретінде ғана емес, сонымен қатар өндіріс пен кәсіпкерліктің дамуына қолайлы аймақ ретінде қалыптасып келеді. Осы бағыттағы маңызды жобалардың бірі – қаладағы Бекзат мөлтек ауданында салынып жатқан өндірістік парк.
Қазіргі таңда өндірістік парк құрылысы қарқынды жүргізілуде. Жалпы аумағы 20 гектарды құрайтын арнайы өндірістік аймақта кәсіпкерлердің өндіріс орындарын орналастыруына қажетті барлық жағдай жасау көзделген. Жоба аясында жалпы саны 26 өндірістік ғимарат салу жоспарланып отыр. Құрылыс жұмыстары үш кезең бойынша жүзеге асырылуда.
Бүгінде жобаның алғашқы кезеңі аясындағы бес өндірістік нысанның құрылысы толық аяқталып, қажетті инженерлік инфрақұрылыммен қамтамасыз етілген. Бұл өз кезегінде инвесторлардың өндірісті қысқа мерзім ішінде іске қосуына мүмкіндік береді.
Өндірістік парк аумағына Түркістан қаласы әкімінің орынбасары Аманжол Бақытжанұлы мен қалалық мәслихат төрағасы Ғаппар Сәрсенбаев арнайы барып, құрылыс жұмыстарының барысымен танысты. Жауапты мамандар жүзеге асырылып жатқан жұмыстар туралы баяндап, алдағы жоспарлармен бөлісті.
Жоба шеңберінде жалпы құны 11,8 миллиард теңгені құрайтын төрт ірі инвестициялық жобаны іске асыру жоспарланған. Атап айтқанда, заманауи өлшеу құралдарын шығару, құрылыс панельдерін өндіру, битум материалдарын дайындау, аккумуляторлар мен электронды схемалар шығаратын өндірістер ашылады. Бұл жобалар өңірдің өнеркәсіптік әлеуетін арттырып қана қоймай, импортты алмастыруға және отандық өнім көлемін ұлғайтуға мүмкіндік береді.
Сарапшылардың пікірінше, мұндай өндірістердің іске қосылуы жергілікті кәсіпкерліктің дамуына серпін беріп, шағын және орта бизнес субъектілері үшін жаңа мүмкіндіктер қалыптастырады. Сонымен қатар, өңірдің инвестициялық тартымдылығын арттырып, жаңа технологиялардың енгізілуіне жол ашады.
Өндірістік жобаларды жүзеге асыру нәтижесінде 600 жаңа жұмыс орнын ашу көзделіп отыр. Бұл қала тұрғындарын тұрақты жұмыспен қамтуға және халықтың әлеуметтік жағдайын жақсартуға елеулі үлес қоспақ. Қазіргі таңда инвесторлармен тиісті келісімдер жасалып, өндірістік жобаларды арнайы өндірістік алаңдарға орналастыру жұмыстары жалғасуда.
Жалпы, Түркістан қаласында жүзеге асырылып жатқан өндірістік парк жобасы өңір экономикасын әртараптандыруға бағытталған маңызды бастамалардың бірі саналады. Жаңа өндіріс орындарының ашылуы өнеркәсіп көлемін ұлғайтып, инвестиция тартуға, экспорттық әлеуетті арттыруға және халықты жұмыспен қамту мәселесін шешуге ықпал етеді.
