Түркістан облысының әкімі Нұралхан Көшеров өңір тұрғындарын жеке қабылдап, олардың өтініштері мен ұсыныстарын тыңдады. Қабылдауға облыстың қала-аудандарынан келген азаматтар коммуналдық сала, жер қатынастары, кәсіпкерлік, инфрақұрылым және әлеуметтік мәселелер бойынша өз талап-тілектерін жеткізді.
Мемлекет басшысы Қасым-Жомарт Тоқаев өз Жолдауларында «Халық үніне құлақ асатын мемлекет» тұжырымдамасын басты бағыттардың бірі ретінде айқындап, тұрғындардың мәселесіне жедел әрі заң аясында жауап берудің маңызын бірнеше рет атап өткен болатын. Осы бағыттағы жұмыстар Түркістан облысында да жүйелі түрде жүзеге асып келеді.
Жеке қабылдауда бірқатар азамат жер телімдерін заңдастыру және жердің нысаналы мақсатын өзгерту мәселелері бойынша көмек сұрады. Сонымен бірге кәсіпкерлер консервтік зауытты модернизациялау, жаңа инвестициялық жобаларды жүзеге асыру үшін мемлекеттік қолдау мен қаржыландыру мәселесін көтерді. Бұдан бөлек, тұрғындар моноқалалардың әлеуметтік-экономикалық дамуына кешенді зерттеу жүргізу жөніндегі жобаларын ұсынды.
Қабылдау барысында денсаулық сақтау саласына қатысты мәселелер де қозғалды. Атап айтқанда, тұрғындардың бірі аурухана дәрігерінің жұмысына байланысты шағымын жеткізді. Сондай-ақ коммуналдық қызмет сапасы, инфрақұрылым және өзге де әлеуметтік түйткілдер көтерілді.
Облыс әкімі әрбір мәселені мұқият тыңдап, жауапты басқарма басшылары мен аудан, қала әкімдеріне заң аясында тиісті жұмыстар жүргізуді тапсырды. Сонымен қатар тұрғындардың өтініштері бақылауға алынып, олардың заң талаптарына сәйкес шешілуі тұрақты назарда болатынын жеткізді. Кейбір мәселелер қабылдау барысында сол мезетте оң шешімін тапты.
Айта кетейік, Түркістан облысының әкімі мен оның орынбасарлары бекітілген кестеге сәйкес тұрғындарды тұрақты түрде қабылдап келеді. Азаматтар жеке қабылдауға eOtinish бірыңғай платформасы арқылы немесе Азаматтарды қабылдау орталығына барып жазыла алады.
