Мемлекет басшысы Қасым-Жомарт Тоқаев халықтың әл-ауқатын арттырудың маңызды тетіктерінің бірі ретінде шағын және орта кәсіпкерлікті дамытуды, азаматтардың кәсіп бастауына қолдау көрсетуді үнемі назарда ұстап келеді. Әсіресе, әлеуметтік осал топтарға жататын азаматтардың кәсіпкерлікпен айналысуына жағдай жасау, олардың экономикалық белсенділігін арттыру және тұрақты табыс көзін қалыптастыру бағытындағы мемлекеттік бағдарламалардың маңызы зор. Осындай қолдаудың игілігін көрген азаматтардың бірі – Ордабасы ауданына қарасты Шұбар ауылының тұрғыны Темірәлі Полатов.
Ол 2025 жылы ІІІ топ мүгедектігі бар азаматтарға арналған мемлекеттік қайтарымсыз грантты жеңіп алып, көптен бергі арманын жүзеге асыруға мүмкіндік алды. Темірәлі Полатов мемлекеттік қолдаудың арқасында көлік бояу және техникалық қызмет көрсету бағытында жеке кәсібін ашып, өз ісін бастады. Бүгінде ол заманауи құрал-жабдықтарды пайдалана отырып, автокөліктерді жөндеу және бояу қызметтерін көрсетіп келеді.
Кәсіпкердің айтуынша, мемлекеттік грант оның кәсібін бастауына үлкен серпін берген. Қайтарымсыз қаржыға қажетті құрал-жабдықтар сатып алынып, қызмет көрсетуге қолайлы жағдай жасалған. Нәтижесінде, ол өз кәсібін тұрақты табыс көзіне айналдырып қана қоймай, ауыл тұрғындарына сапалы қызмет көрсетуге мүмкіндік алған.
Қазіргі таңда Темірәліге көліктерін жөндету немесе сырлату үшін келетін тұрғындардың қатары артып келеді. Оның жауапкершілікпен атқаратын жұмысы мен сапалы қызметі жергілікті тұрғындардың сеніміне ие болуда. Мемлекеттік қолдау бағдарламаларының басты мақсаты – азаматтардың кәсіпкерлік бастамаларын қолдау, жаңа жұмыс орындарын құру және халықтың тұрмыс деңгейін жақсарту. Әсіресе, еңбекке қабілеттілігі шектеулі азаматтардың қоғам өміріне белсенді араласып, өз кәсібін жүргізуіне мүмкіндік беру әлеуметтік саясаттың маңызды бағыттарының бірі болып саналады.
Қорыта айтқанда, Темірәлі Полатовтың еңбекқорлығы мен табандылығы көптеген азаматтарға үлгі болып, кәсіп бастауға ниетті жандарға жігер береді. Жалпы мемлекет тарапынан көрсетіліп жатқан гранттық қолдау шаралары азаматтардың кәсіпкерлік әлеуетін дамытуға, халықты жұмыспен қамтуға және әлеуметтік жағдайын жақсартуға бағытталған маңызды тетік болып қала береді. Ал, Темірәлі секілді кәсіпкерлердің табысты тәжірибесі мұндай бағдарламалардың тиімділігін айқын көрсетіп отыр.
