Мемлекет басшысы Қасым-Жомарт Тоқаев өңдеу өнеркәсібін дамыту, инвестиция тарту және жаңа жұмыс орындарын ашу мәселелерін еліміздің экономикалық саясатының басым бағыттарының бірі ретінде айқындап келеді. Осыған сәйкес өңірлерде өндіріс орындарын көбейту және кәсіпкерлікті қолдау бағытында жүйелі жұмыстар жүзеге асырылуда.
Сайрам ауданында да өндірістік әлеуетті арттыруға бағытталған маңызды инвестициялық жобалар кезең-кезеңімен қолға алынуда. Солардың бірі – Манкент ауылдық округінде жүзеге асырылып жатқан май өндіретін «ИП Табыс» зауытының құрылысы. Жақында аудан әкімі Мадияр Оразалиев аталған өндірістік нысанның жобасымен танысып, құрылыс жұмыстарының барысын көрді. Жауапты мамандар аудан басшысына кәсіпорынның өндірістік қуаттылығы, құрылыс кезеңдері және болашақтағы жұмыс жоспары жөнінде жан-жақты ақпарат берді.
Жобаның жалпы инвестициялық құны 1,2 миллиард теңгені құрайды. Жоспар бойынша кәсіпорын 2026 жылдың соңына дейін толық іске қосылады. Өндіріс орны пайдалануға берілгеннен кейін 40 жаңа жұмыс орны ашылып, жергілікті тұрғындарды тұрақты жұмыспен қамтуға мүмкіндік жасалады. Кездесу барысында аудан әкімі инвестициялық жобаларды белгіленген мерзімде және сапалы жүзеге асырудың маңыздылығына тоқталды. Сонымен қатар, өндіріс пен кәсіпкерлікті дамыту аудан экономикасының өсіміне тікелей ықпал ететінін атап өтті.
Жаңа зауыт іске қосылғаннан кейін өңірдің агроөнеркәсіптік кешенін дамытуға өзіндік үлесін қоспақ. Атап айтқанда, жергілікті шикізатты терең өңдеу мүмкіндігі артып, қосылған құны жоғары өнім өндіруге жол ашылады. Бұл өз кезегінде өңделген өнім көлемін ұлғайтып, ауданның өндірістік әлеуетін нығайтуға ықпал етеді. Сондай-ақ, кәсіпорынның жұмысы ауыл шаруашылығы өнімдерін тиімді пайдалануға мүмкіндік беріп, жергілікті шаруалар үшін жаңа нарық қалыптастыруға жағдай жасайды. Нәтижесінде, ауыл шаруашылығы мен өңдеу өнеркәсібі арасындағы байланыс нығайып, өңір экономикасының тұрақты дамуына серпін береді.
Бүгінде Сайрам ауданында инвестициялық ахуалды жақсарту, кәсіпкерлерді қолдау және жаңа өндіріс орындарын ашу бағытындағы жұмыстар жүйелі түрде жүргізілуде. Манкент ауылдық округіндегі май өндіретін зауыт жобасы – осы бағыттағы маңызды бастамалардың бірі. Алдағы уақытта мұндай инвестициялық жобалардың саны артып, жаңа кәсіпорындардың ашылуы аудан тұрғындарын жұмыспен қамтуға, өндіріс көлемін ұлғайтуға және өңірдің әлеуметтік-экономикалық дамуын қамтамасыз етуге оң ықпал етпек.
