Халықтың өмір сүру сапасын арттыру үшін елді мекендерді сапалы инфрақұрылыммен қамтамасыз ету маңызды. Ел Президенті Қасым-Жомарт Тоқаев азаматтардың тұрмысын жақсартуға бағытталған жобалар әрдайым мемлекет назарында болуы тиіс екенін атап өтіп келеді.
Президент жүктеген міндеттер аясында Сарыағаш ауданында тұрғындарды табиғи газбен қамтамасыз ету бағытындағы жұмыстар жүйелі түрде жалғасуда. Соның бірі – Дарбаза ауылдық округіне қарасты елді мекендерді көгілдір отынмен қамту жобасы.
Осыған орай, Сарыағаш ауданының әкімі Арман Абдуллаев Дарбаза ауылдық округіндегі табиғи газ тарту жұмыстарының барысымен танысып, құрылыс нысандарында атқарылып жатқан жұмыстарды пысықтады. Аудан басшысы мердігер мекеме өкілдеріне құрылыс қарқынын күшейтуді, жұмыстардың сапасын қатаң бақылауда ұстауды және жобаны белгіленген мерзімде аяқтауды тапсырды.
Қазіргі таңда Дарбаза ауылдық округіне қарасты Тасқұдық, Құрысай және Сарысу елді мекендерінде табиғи газ құбырларын тарту жұмыстары қарқынды жүргізілуде. Мамандардың мәліметінше, құрылыс жұмыстарының 90 пайызы аяқталған.
Жоба толық іске асқаннан кейін Тасқұдық, Құрысай және Сарысу елді мекендерінің тұрғындары табиғи газ игілігін пайдалануға мүмкіндік алады. Бұл өз кезегінде халықтың тұрмыс сапасын жақсартып, өңірдің әлеуметтік-экономикалық дамуына оң әсерін тигізеді.
Аталған жобаның мердігері – «Ынтымақ-ОК» ЖШС. Ал, тапсырыс беруші – Сарыағаш ауданының тұрғын үй-коммуналдық шаруашылық бөлімі.
