Мемлекет басшысы Қасым-Жомарт Тоқаев өз Жолдаулары мен қоғамдық бастамаларында қоршаған ортаны қорғау, экологиялық мәдениетті қалыптастыру және елді мекендердің тазалығын сақтау мәселелеріне ерекше назар аударып келеді. Президенттің бастамасымен қолға алынған «Таза Қазақстан» республикалық экологиялық бағдарламасы аясында өңірлерде жүйелі жұмыстар атқарылуда.
Осы бағыттағы жұмыстар Кентау қаласында да қарқынды жүзеге асырылып келеді. Кезекті жалпықалалық сенбілік Жастар саябағында ұйымдастырылып, оған қала әкімі Жандос Тасов, мемлекеттік мекемелердің қызметкерлері, жастар және белсенді тұрғындар қатысты.
Сенбілік барысында саябақ аумағы тұрмыстық қалдықтардан тазартылып, қураған шөптер шабылды, ағаштар мен жасыл желектердің айналасы ретке келтірілді. Қатысушылар қоғамдық орындардың тазалығын сақтауға өз үлестерін қосып, қоршаған ортаға жанашырлық танытты.
Іс-шара барысында қала әкімі Жандос Қалмырзаұлы сенбілікке белсенді қатысқан тұрғындарға алғыс білдіріп, туған қаланың тазалығы мен көркеюі әрбір азаматтың ортақ жауапкершілігі екенін атап өтті. Сондай-ақ тұрғындарды экологиялық мәдениетті қалыптастыруға және тазалық жұмыстарын тұрақты қолдауға шақырды.
Айта кетейік, «Таза Қазақстан» бағдарламасы аясындағы жұмыстар Кентау қаласында жүйелі түрде жалғасуда. Қала аумағын абаттандыру, көгалдандыру және санитарлық тазалығын сақтау бағытындағы іс-шаралар алдағы уақытта да тұрақты жүргізілмек.
