Мемлекет басшысы Қасым-Жомарт Тоқаев мемлекеттік органдар қызметінің ашықтығын қамтамасыз ету, халықпен тиімді кері байланысты нығайту және азаматтардың өтініштеріне жедел ден қою міндеттерін үнемі назарда ұстап келеді. Осы бағыттағы жұмыстар аясында Түркістан облысында тұрғындарды жеке қабылдау тұрақты түрде ұйымдастырылып келеді.
Осыған орай Түркістан облысы әкімінің орынбасары Қанат Қайыпбек өңір тұрғындарын жеке қабылдап, олардың өтініштері мен ұсыныстарын тыңдады. Қабылдауға келген азаматтар өңірдің әлеуметтік-экономикалық дамуына қатысты ұсыныстарын білдіріп, өзекті мәселелерді көтерді.
Қабылдау барысында Түркістан қаласының тұрғыны шаһардың әлеуметтік және экономикалық даму бағдарламаларын жетілдіруге қатысты ұсыныстарын жеткізді. Облыс әкімінің орынбасары аталған бастаманың маңыздылығына тоқталып, ұсыныс тиісті сала мамандары тарапынан жан-жақты зерделенетінін атап өтті.
Сондай-ақ Сауран ауданының Игілік ауылының тұрғыны елді мекен көшелерін жөндеуге қаржы бөлінгеніне ризашылығын білдіріп, өңірде жүзеге асырылып жатқан жұмыстарға оң бағасын берді. Бұдан бөлек, алдағы жобалардың табысты жүзеге асуына тілектестік білдірді.
Қабылдау кезінде азаматтар экологиялық мәртебе, мемлекеттік сатып алу рәсімдері және басқа да өзекті мәселелер бойынша сұрақтарын қойып, ұсыныстарын жеткізді.
Қанат Қайыпбек тұрғындардың көтерген мәселелері мен ұсыныстары назардан тыс қалмайтынын айтып, әрбір өтініш қолданыстағы заңнама талаптарына сәйкес қаралатынын жеткізді. Сонымен қатар жауапты басқармаларға көтерілген мәселелер бойынша тиісті жұмыстар жүргізіп, нақты ұсыныстар әзірлеуді тапсырды.
Айта кетейік, Түркістан облысында тұрғындарды жеке қабылдау жұмыстары тұрақты түрде жалғасып келеді. Азаматтардың өтініштері мен ұсыныстары бақылауға алынып, заң аясында тиісті шаралар қабылдануда.
Облыс әкімінің және оның орынбасарларының жеке қабылдауына жазылуды Түркістан облысы әкімі аппаратының өтініштерді қарауды бақылау бөлімі жүзеге асырады. Қабылдауға eGov порталы, e-Otinish бірыңғай платформасы немесе Азаматтарды қабылдау орталығына жазбаша өтініш беру арқылы тіркелуге болады.
