Орталық сайлау комиссиясының мәліметінше, сағат 12:00-дегі жағдай бойынша Түркістан облысында сайлаушылардың 43,14 пайызы дауыс беруге қатысқан. Өңір тұрғындары бүгін өтіп жатқан Құрылтай депутаттарының сайлауына белсенді қатысып, өз азаматтық таңдауын жасауда. Еліміз бойынша сағат 12:00-дегі көрсеткішке сәйкес, 4 670 816 сайлаушы бюллетень алған. Бұл сайлаушылар тізіміне енгізілген азаматтардың 37,05 пайызын құрайды.
Түркістан облысындағы сайлаушылардың белсенділігі өңір тұрғындарының қоғамдық-саяси үдеріске деген қызығушылығы жоғары екенін көрсетеді. Өңірде сайлаушылардың дауыс беруіне қажетті жағдайлар толық қамтамасыз етілген. Түркістан облысында барлығы 952 сайлау учаскесі жұмыс істеп тұр. Оның ішінде 26 учаске жабық нысандарда орналасқан. Сонымен қатар, ерекше қажеттілігі бар 14 873 сайлаушы үшін дауыс беруге қолайлы жағдай жасалған.
