Түлкібас ауданында Құрылтай сайлауы ұлттық өнер мен дәстүр сабақтастығын айшықтаған ерекше көрініспен жалғасты. «Арша» халықтық ұжымының 20-30-ға жуық мүшесі ұлттық киім киіп, сайлау учаскесіне келіп, дәстүрлі әндерді орындады және өз таңдауларын жасады.
Ұлттық нақыштағы киім киген өнерпаздардың орындауындағы қазақтың дәстүрлі әндері сайлау учаскесіне келген тұрғындарға көтеріңкі көңіл-күй сыйлады. Домбыра үнімен үндескен әсем әндер ұлттық мәдениетті дәріптеп, маңызды күннің мазмұнын толықтыра түсті. «Арша» халықтық ұжымының бұл бастамасы елдік шара мен ұлттық өнердің өзара сабақтастығын көрсетті. Өнерпаздардың көпшілік алдында дәстүрлі әндерді орындауы халқымыздың рухани мұрасын насихаттауға, кейінгі буынның ұлттық өнерге қызығушылығын арттыруға ықпал етеді.
Мұндай көріністер Құрылтай сайлауының әр өңірде өзіндік ерекшелікпен өтіп жатқанын көрсетеді. Ұлттық киім, дәстүрлі ән және өнерпаздардың белсенділігі сайлау күнінің қоғамдық маңызын айшықтай түсті.
