Төлеби ауданында Құрылтай сайлауы ұлттық құндылықтар мен өнерді дәріптеген ерекше көріністермен жалғасын тапты. Аудандық «Домалақ ана» ансамблінің 15 мүшесі ұлттық киімдерін киіп, сайлау учаскесіне бірге келіп, өз таңдауларын жасады.
Ансамбль мүшелерінің ұлттық нақыштағы киіммен дауыс беруі сайлау күнінің мазмұнын айшықтап, елдік маңызды шараны халқымыздың салт-дәстүрі және мәдениетімен сабақтастыра түсті. Әсем ою-өрнекпен көмкерілген ұлттық киімдер ансамбль өкілдерінің қоғамдық ортадағы ерекше бейнесін қалыптастырды. «Домалақ ана» ансамблі — ауданның мәдени өміріне белсенді араласып, ұлттық өнерді насихаттап жүрген шығармашылық ұжымдардың бірі. Олардың сайлау учаскесіне бір құрамда келуі өнер адамдарының қоғамдық өмірге де белсенді қатысатынын көрсетті. Сайлау учаскесіндегі бұл көрініс тұрғындардың да назарын аударып, мерекелік көңіл-күй қалыптастырды. Өнер мен ұлттық дәстүр үндескен сәт Құрылтай сайлауын ел өміріндегі маңызды күн ретінде айшықтай түсті.
Айта кетейік, Төлеби ауданында 69 сайлау учаскесі жұмыс істейді. Оның 67-сі ашық, 2-еуі жабық нысанда. Аудан бойынша 70 328 сайлаушы дауыс беру құқығына ие.
