Кентау қаласындағы Жүйнек ауылдық округінің тұрғыны Ұғылпатша Қаһарова бес жылдан бері жылқы бағып, оны семіртіп сатумен айналысып, келеді. Шаруа әйел кәсібін ең алдымен өз қаржысына алты жылқы сатып алып бастаған. Тынымсыз еңбек пен төгілген тердің арқасында бүгінде жылқысының санын қырық басқа жеткізіп отыр.
Түркістан облысының өңірлік коммуникациялар қызметінің хабарлауынша, іскер ана жылқыларды Қостанай облысынан алдыртады екен. Күтімі жақсы болса әр жылқы 250-350 келіге дейін ет береді. Асыл тұқымды жылқылар ерекше күтімді керек ететіндіктен Ұ.Қаһарова тәулігіне 7-8 сағат уақытын Қамбар ата түлігінің қасында өткізеді.
Ұғылпатша ананың балалары да отбасылық кәсіптен сырт қалмаған. Аналарына қолғабыс болып, жылқы асыраудың қыр-сырын меңгеріп жүрген жайлары бар. Тіпті, Ұғылпатша ананың үлкен ұлы ветеринар мамандығын оқып, жылқыларға күтімді өзі жасап жүр.
Иә, жылқы етіне сұраныс қай кезде де азайған емес. Осыны жақсы білетін еңбеккер ана өзінің тұрақты тұтынушылары бар екенін айтады. Оған саумал өндіру жайлы ұсыныс айтып жүргендер де көп екен. Алдағы уақытта Ұ.Қаһарова апа бұл ұсынысты да жүзеге асыруды жоспарлап жасап жүр.
