«ФахриСтрой» ЖШС бастапқыда тәулігіне 150 текше метр өнім шығарған болса, бүгінде сұраныстың артуына қарай 600-700 текше метрге дейін өнім өндіріп келеді. Мамандар өнім көлемінің бірнеше есеге артуын Түркістан қаласында жүргізіліп жатқан құрылыс жұмыстарымен байланыстырады. Яғни аталған мекеме облыс орталығындағы құрылыс алаңдарына дайын өнім жеткізіп, сұраныстың 60 пайызын қанағаттандырып отыр.
Серіктестікте 75 адам тұрақты жұмыс істейді. Түркістан облысының өңірлік коммуникациялар қызметінің хабарлауынша, жұмысшылардың басым бөлігі – жергілікті тұрғындар.
Осылайша бір жылда миллиард теңгенің өнімін шығарған зауыт алдағы уақытта газоблок шығаруды да қолға алмақ. Серіктестік басшыларының айтуынша, зауыттың қосымша блогының құрылысы қазан айының ортасына қарай аяқталып, іске қосылмақ. Сондай-ақ, серіктестік келесі жылы асфальт зауытын салуды да жоспарлап отыр.
