Балғын балалар — біздің болашағымыз

Халықаралық балаларды қорғау күні барлық елде 1950 жылдан бері аталып өтіп келеді. Басты мақсат — балалардың өмірін, құқығын, денсаулығын қорғап, оларға қамқорлық жасау арқылы болашақ ұрпақтың бақытты өмірін қалыптастыру.
Атаулы күнге арналған іс-шаралар Кентау қаласында да жоғары деңгейде өтті.
Қалалық Қазақстан халқы Ассамблеясы жанындағы Аналар кеңесі «Балғын балалар — біздің болашағымыз» атты акция ұйымдастырды.

Кеңес төрайымы Маржан Кривенцова және мүшелері Роза Аяпбергенова, Дильдар Хабибова, Ұлбала Мұсаханова, Мақпал Абишева, Ұлболсын Салмаханова «Жүректен жүрекке» акция аясында 6 көпбалалы, мүмкіндігі шектеулі баласы бар отбасыларға тәттілер сыйлады.
Қарнақ ауылдық өзбек этномәдени бірлестігінің төрағасы Бегзат Хабибовтың бастамасымен Қарнақ ауылдық өзбек этномәдени бірлестігі жанындағы жастар ұйымының жетекшісі Дастон Абдалиев балаларға 800 балмұздақ таратып, 50 балақайға сыйлықтар үлестірді.

Ал, «Оқуға құштар мектеп» жобасы аясында 10 жалпы орта мектебінің кітапханасында «Менің сүйікті кейіпкерлерім» атты тақырыпта жазғы мектепке келетін оқушылар арасында сурет салу байқауы өтті. Жеткіншектер өздерінің жақсы көретін кейіпкерлерінің бейнелерін ақ қағазға түсірді. Мектеп директоры Г.Қадырова, қалалық адами әлеуетті дамыту бөлімінің әдіскерлері Н.Кузенбаева, М.Ерназарова үздік сурет иелерін құттықтап, оқушыларға алғыс хаттар тапсырды.