«Мардымсыз жылуға төлемақы талап етілмесін»

Жылу жайы Кентауда қалыпқа келмей жатыр. Жиі-жиі шағымданып жатқан тұрғындар мардымсыз жылудан үйлерінің толық жылымай жатқандықтарын жеткізуде. Тіпті, бұл мәселе кешегі күні республикалық телеарналардан да көрсетілді. Ал, қала әкімдігінде өткен баспасөз мәслихатында жылуға жауапты мамандар шағымның неге көбейіп кеткендігін түсіндірді.
25-ші қаңтар күні Түркістан облысы бойынша бір мезетте жарықтың сөнуі салдарынан №5 Жылу орталығының жұмысы да 3 сағатқа тоқтаған болатын. Нәтижесінде жылу құбырларында ауа қалып, бірқатар көп қабатты үйлерге жылу мардымсыз берілуде.
«Қалада ең алдымен, көп қабатты тұрғын үйлердің жылуын қалыпқа келтіруге басымдық беріліп жатыр. Сол үшін мамандар әр кварталда күндізгі уақытта 2 сағат көлемінде жылуды өшіріп, ауаны кетіру жұмыстарын атқаруда. Ол жұмыстар кемі 2-3 күнді алады. Апта соңына дейін барлық көп қабатты үйлердің жылулары қалыпқа келетін болады» — деді орталық директорының орынбасары А.Төлеу.
Сонымен қатар, қосымша жылуға қосылған коммерциялық нысандарды жылудан ажырату жұмыстары жүргізілмек. Себебі, Кентау қалалық №5 Жылу орталығы барлығын қамтуға күші жетпейді. Ал, жылу орталығының басты мақсаты қаладағы 348 көпқабатты үйлерді жылумен қамту.
Әлеуметтік желілерде пікір білдірушілер жылудың жоқтығын айтып, мардымсыз берілген жылуға толық төлемақы талап етпеу керектігін айтуда. Мәселен, фейсбук әлеуметтік желісінде Ақнұр Нұрымбетова есімді тұрғын жылудың жоқтығын үйге келіп тексерсін деп жазды.
«Жылуды дұрыстап беруін талап етеміз. Болмаса халықтан жылудың ақшасын талап етпесін. 27-нен бері қонырау шалудамын, «міне барады» деп өтірік әңгімелерін айтып отыра береді. Үйіме келсін, көрсін деп те айттым, келмеді сол күйі» — деп жазды.
Ал, Нұрлан Қалымбет есімді тұрғын ЖЭО неге автономды режимде жұмыс істемейтіндігін сұрады.
«Электр энергиясы өшсе осындай жағдайдан қашып құтыла алмайтындарыңды түсінетін уақыт жетті ғой» — деп жазды ол.