Түркістан облысында тұрғындардың 84% ревакцинацияланды

Covid 19 дертіне қарсы екпе қабылдаған соң 6 айдан кейін ревакцинациядан өту маңызды. Қазіргі таңда Түркістан облысы халқының 689 533-і, яғни 84,2% ы коронавирусқа қарсы ревакцинацияланған. Бұл туралы Түркістан облысы Бас санитариялық дәрігерінің орынбасары Бахтыораз Елемесов мәлімдеді.
«23-мамыр күні Қазақстан Республикасының Бас мемлекеттік санитариялық дәрігерінің елімізде коронавирус инфекциясы жөніндегі санитариялық-эпидемияға қарсы және санитариялық-профилактикалық іс-шараларды ұйымдастыру және өткізуге қатысты қаулысы шыққан. Онда Қазақстанның аумағында 3 және одан да көп ай тұратын шетел азаматтарын қоса алғанда, барлық адамдар КВИ-ге қарсы ревакцинацияға жататындығы, сонымен қатар, КВИ-ге қарсы ревакцинацияны алдыңғы профилактикалық екпелерді салдырғанына, және бірінші ревакцинацияны алғанына 6 ай өткен адам салдырады делінген»-деді Бахтыораз Мизамұлы.
Сондай-ақ санитариялық маман ревакцинацияның иммунитетті қайта қалпына келтіруге пайдасы көп екенін және соның арқасында аурушаңдық төмендеп, карантиндік шектеулердің алынып тасталуына сеп болғанын жеткізді.